Pájina aktualizada iha 02:18h, sabado 24 Agostu

Parseria entre instituisaun sira importante tebtebes ba funsionamentu husi fórum sosiedade sivil nian

27 de Junho de 2012, 12:14

Horseik, diretór jerál husi Fundasaun Eduardo dos Santos hateten katak reforsi parseria entre instituisaun nasoens luzófonu nian ne’e importante tebtebes atu bele halo fórum husi sosiedade sivil Comunidade dos Países de Língua Portuguesa (CPLP) nian la’o.

“Importante tebes atu hametin relasaun entre parseria husi organizasaun oioin, tanba husi relasaun ne’e mak fórum sosiedade sivil CPLP nian bele funsiona”, tenik João de Deus, husi Fundasaun Eduardo dos Santos (Angola) ba ajénsia Lusa.

Sorumutu VI ne’ebé hala’o entre Observadór Konsultivu nó Sekretáriu Ezekutivu CPLP nian, sei hala’o ohin, iha Lisboa iha duni sede husi organizasaun refere.

Observadór konsultivu CPLP nian mai husi organizasaun sosiedade sivil nian, hanesan Fundasaun Gulbenkian, Akademia Brazileira Letra, seluk-seluk tan mak hanesan husi universidade oioin nó instituisaun sientífika.

Organizasaun barak ne’ebé sai hanesan observadór konsultivu husi komunidade CPLP nian, halo parte ona iha Fórum I husi Sosiedade Sivil CPLP, nian iha Brasília.

Ba Maria Hermínia Cabral, diretora adjunta Fundasaun Gulbenkian nian hanesan mós Duarte Pio, prezidente husi Fundasaun D.Manuel II mós konsidera katak importante duni atu hametin organizasaun sosiedade sivil nian sira. “Instituisaun hothotu tenki kordena didiak sira ninia atividade nó sira ninia intervensaun polítika.

Presiza atu hametin relasaun ne’e, atu nune’e labele iha duplikasaun ba esforsu nó kria sinerjia entre instituisaun hothotu, atu nune’e bele halo buat ida ho maiór efikásia”, tenik Duarte Pio.

“CPLP hanesan komunidade husi sidadaun sira nó ita tenki komprende ho definisaun ne’ebé iha. Organizasaun hothotu tenki hakbesik ba malu, atu nune’e bele haree saida mak di’ak ba sidadaun”, tuir saida mak Maria Hermínia Cabral hateten.

Durante reuniaun ida ohin ne’e, hato’o ona rekomendasaun balun ba CPLP, nó iha simeira husi xefe Estadu nó Governu bloku luzófonu nian ne’ebé sei hala’o iha loron 20 fulan Jullu, agora iha Maputo ne’e mós sei halo diskusaun kona-ba asuntu refere.

“Kona-ba rekomendasaun sira ne’e, observadór importante sira ko’alia barak liu kona-ba kestaun seguransa alimentár nó nutrisionál ne’ebé sai hanesan preokupasaun bot, hanesan mós kestaun edukasaun ba dezenvolvimentu”, tenik Fernando Cupertino husi Konsellu Nasionál Sekretáriu Saúde (Barzil).

Simeira ba IX ne’ebé xefe Estadu nó Governu CPLP sira sei hala’o iha Mosambike ne’e ho títulu “CPLP nó Dezafiu husi Seguransa Alimentár nó Nutrisionál”.

“Rekomendasaun ida ne’ebé ha’u nia instituisaun aprezenta mak atu halo divulgasaun hamutuk ho nasaun membru sira kona-ba simpóziu internasionál luzu-frankófonu ida ne’ebé sei hala’o iha sidade Praia, hahú husi loron 5 to’o loron 9 fulan Novembru, atu halo anális nó troka experiénsia kona-ba problemátika rekursu umanu iha kuidadu primária”, hatutan liu tan Cupertino.

Fórum observadór konsultivu CPLP nian mós hakarak kria grupu temátiku ida ne’ebé bele “produz instrumentu atu hodi hametin liu tan relasaun (entre organizasaun husi sosiedade sivil) nó hakarak atu enkamiña rekomendasaun hirak ne’e ba xefe Estadu (nó governu husi komunidade luzófona”, tenik João de Deus.

“Evidente duni katak grupu temátiku barak mak ladun halo konsensu (iha reuniaun ida ohin), maibé ha’u fia’r katak ami tenki hasoru malu dala-ida tan, ami tenki ba halo parte iha simeira Mosambike nian nó atu defini konkretamente kona-ba saida mak ami hakarak relasiona ho sosiedade sivil husi CPLP”, tenik João de Deus.

Tuir diretór jerál CPLP, Hélder Vaz katak rekomendasaun hirak ne’e hato’o husi observadór konsultivu “ne’ebé ajuda barak ona”.

“(Rekomendasaun) hanesan kontributu ida atu hadiak liu tan funsionamentu iha organizasaun ne’e rasik, iha ninia vertenten oioin nomós ba iha instrumentu barak ne’ebé CPLP iha”, haktuir Vaz.

Lusa/fim

Comentários

Critério de publicação de comentários