Pájina aktualizada iha 08:58h, segunda-feira 25 Novembru

Governu husu ba PNTL atu hasai grupu CPD-RDTL husi Welaluhu

19 de Março de 2013, 17:04

Vise-primeiru ministru Fernando La Sama de Araújo, ministru Komérsiu Indústria no Ambiente António da Conceição no grupu CPD-RDTL nian hala’o diálogu kona-bá membru husi CPD-RDTL ne’ebé kontinua hela nafatin iha Welaluhu, Fatuberlihu, Same, maibé seidauk hetan rezultadu kona-bá ne’e.

Estadu husu ba komandu jerál Polísia Nasional Timor-Leste nian hodi obriga membru CPD-RDTL sai husi distritu refere.

Oras ne’e daudaun komandu PNTL prontu atu halo atuasaun iha Welaluhu hodi haruka fila membru CPD-RDTL idaidak bá sira ninia distritu, tuir akordu rezolusaun ne’ebé Konsellu Ministru fó ba sira.

Ministru António da Conceição hateten katak diálogu entre Estadu no CPD-RDTL seidauk hetan ninia rezultadu. Grupu refere sei kontinua hela nafatin iha terenu husi komunidade Fatuberlihu.

“Ami ninia dever mak halo diálogu ho sira, atu nune’e seira bele sai voluntariamente de’it. Estadu konsidera katak sira hela iha ne’ebá ilegalmente de’it, tanba ne’e mak sira tenki foti desizaun tuir rezolusaun ne’ebé hato’o husi Konsellu Ministru”, tenik António.

SAPO TL ho Suara Timor Lorosa’e

Comentários

Critério de publicação de comentários