Pájina aktualizada iha 12:16h, domingu 20 Janeiru

Trajédia hatudu situasaun triste mundu nian - Xanana Gusmão

26 de Julho de 2014, 18:02

Primeiru-ministru Timor-Leste nian, Xanana Gusmão, afirma ona, iha loron-sesta ne'e, katak trajédia aviaun MH17 hatudu situasaun triste mundu nian ba "dezorden no deskonfiansa".

Vijília ida ba vítima sira MH17 no MH370 nian iha Kuala Lumpur, Malázia. EPA@ Ahmad Yusni

"Trajédia aviaun MH17 hatudu situasaun triste agora daudaun mundu nian. Ita hotu hein katak Funu Malirin ninia rohan sei lori ba orden mundiál foun ida koperasaun no progresu nian, maibé, ohin loron ita iha mundu ida dezorden no deskonfiansa nian", haktuir hosi xefe governu timoroan nian.

Boeing 777 hosi Malaysia Airlines, ne'ebé halo ligasaun entre Amesterdaun no Kuala Lumpur ho númeru MH17, monu iha semana liubá iha rejiaun leste Ukránia nian ho ema na'in 298 iha aviaun laran, hafoin, karik, hetan tiru hosi missil ida ne'ebé komunidade internasionál hatete katak dispara hosi rebelde pró-rusu sira.

Xefe governu timoroan nian ko'alia iha sesaun abertura ba Reuniaun ho Parseiru ba Dezenvolvimentu Timor-Leste nian ne'ebé hala'o to'o loron-sábadu ne'e iha Díli.

Enkontru, ne'ebé halobur governu timoroan ho parseiru sira dezenvolvimentu nian, hakarak analiza objetivu sira ne'ebé alkansa ona no dezafiu sira ne'ebé sei mosu.

"Ohin hamutuk ho ita reprezentante sira hosi nasaun sira ne'ebé terus iha eventu terivel ne'e, inklui ita ninia belun di'ak sira hosi Austrália no Nova Zelándia. Ba sira, ha'u hakarak hato'o povu Timor-Leste ninia kondolénsia", Xanana Gusmão afirma no hatutan katak nia hakerek mós ona ba primeiru-ministru Malázia nian.

ho Lusa

 


Comentários

Critério de publicação de comentários