Pájina aktualizada iha 12:45h, tersa-feira 18 Juñu

TT halo parseria ho Wikipedia no oferese asesu gratuitu ba kliente sira

21 de Agosto de 2014, 16:57

Timor Telecom (TT) ohin fó sai sira-ninia parseria foun ho Wikimedia Foundation, organizasaun ida ne’ebé la iha fundu lukrativu hodi jere Wikipedia no ninia projetu sira ne’ebé asosia ona, iha Hotel Timor.


Diretor relasaun Institisional TT Manuel Carceres, vise-ministru ensinu sekundáriu Virgilio Smith, jestor projetu iha TT João Sousa, diretor area marketing TT Bernadino Machado, CEO da TT, Manuel Capitão Amaro.
Foto: Ana Guterres @SAPO TL

Timor Telecom ne’ebé sai nu’udar operadór dahuluk iha Timor-Leste, liuhosi programa globál Wikipedia Zero sei oferese asesu ilimitadu ba site Wikipedia ho forma gratutitu, hahú hosi dispozitivu móvel sira.

Bele hetan asesu grátis iha kualker telemóvel liu hosi link: zero.wikipedia.org ou m.wikipedia.org.

Timor Telecom sei disponibiliza lian haat ne’ebé populasaun Timor-Leste ko’alia, hanesan tétum, portugés, indonézia no ingles iha pájina ofisiál Wikipedia.

Desde TT hahú mosu, empreza refere hatudu ona avansu kona-ba teknolojia, adapta saida maka ninia kliente presija/nesesidade hosi ninia kliente, nune’e atu kontribui ba liberalizasaun asesu ba konteúdu Internet nian.

Parseria ida ne’e sei fó benefísiu ba timoroan sira hotu, espesiál liu ba estudante sira, tanba sira bele hetan asesu kona-ba konteúdu hirak ne’ebé bele aumenta sira-nia koñesimentu, ho forma grátis/la selu, kontribui ba sosiedade ida ne’ebé informadu no dezenvolvidu liu tán, tuir informasaun iha komunikadu imprensa.

Programa Wikipedia Zero iha ligasaun ho estratéjia TT nian atu halo di’ak liu tán ligasaun sidadaun timoroan sira ba mundu.

Manuel Capitão Amaro, hanesan CEO hosi empreza Timor Telecom dehan iha komunikadu katak: “hanesan líder iha merkadu, ami sente kontente tebes ho parseria ida ne’e no bele halo parte iha projetu globál Wikipedia nian. Hetan oportunidade hodi oferese konteudu  gratuitamente ba ami-nia kliente no bele fó kontribuisaun atu aumenta/hariku liu tan povu Timór ninia koñesimentu,  ne’ebé ne’e sai hanesan pasu boot ida no importante ba Timor Telecom, maka durante tinan 12 ajuda barak ba dezenvolvimentu sosiedade timoroan nian”.

"Wikipedia Zero iha impaktu boot iha mundu tomak, lori koñesimentu barak liu tán ba ema sira ne’ebé, laiha dalan atu bele hetan asesu ba ida ne’e", dehan Carolynne Schloeder, Directora Parseria Móvel husi Fundasaun Wikimedia.

Iha sesaun direta, liu hosi Skype, Carolynne sente haksolok tebes hodi simu Timor Telecom no ninia kliente sira iha rede koñesimentu livre.

Iha aprezentasaun hosi servisu foun ne’e, diretór hosi relasaun institusionál Manuel Cárceres lansa ona dezafiu ba estudante sira atu kria konteúdu ho informasaun lolos, tanba Wikipedia hakarak atu utilizadór sira sai mós kriadór no editor ba informasaun.

Wikipedia nu’udar ensiklopédia online ne’ebé boot liu, fulan-fulan ema vizita besik rihun 500, konforme dadus sira husi ComScore Media Metrix. Wikipedia ne’e iha artigu rihun 29 maka rezulta husi komunidade globál besik voluntáriu rihun 80.

Oras ne’e daudaun iha ona artigu 800 ne’ebé hakerek ho dalen tétum.

SAPO TL

Comentários

Critério de publicação de comentários