Pájina aktualizada iha 08:01h, domingu 19 Novembru

Governu Timoroan transfere poder ba autoridade Oe-kusse Ambenu

17 de Janeiro de 2015, 12:02

Ezekutivu timoroan formaliza iha semana oin "transferénsia poder no devolusaun kompeténsia" hosi Governu Sentrál ba Autoridade Rejiaun Administrativa Espesiál Oe-Kusse Ambenu, fo sai horisehik iha komunikadu.

Foto: Epifânio Sarmento @Sapo TL

Governu esplika mós katak membru ezekutivu partisipa iha loron 23 Janeiru iha reuniaun Konsellu Ministru sira nian ida iha Pante Makasar, kapitál Oe-Kusse Ambenu nian.

Enkontru ne’e hodi "diskuti medida importante ne’ebé sei foti hodi fo prioridade ba dezenvolvimentu distritu nian, inklui transferénsia ba poder".

Governu fo hanoin katak konstituisaun timoroan nian rekoñese estatutu espesiál enklave nian maka lokaliza iha noroeste hosi illa Timor nian ho " tratamentu administrativu no ekonómiku espesiál" no "polítika administrativa no rejime ekonómiku espesiál".

Mari Alkatiri, prezidente autoridade rejionál nian, esplika ba Lusa katak transferénsia ba poder mai hosi lei no abranje poder hotu eseptu autonomia polítika no ne’ebé sei marka ho hahalok públiku iha rejiaun, iha loron-sexta oin mai.

Eis primeiru ministru timoroan ne’e hatete katak projetu kriasaun ba Zona Espesiál Ekonomia Sosiál Merkadu (ZEESM) Oekusse nian ne’e avansa ho forma lalais tanba komemorasaun ba tinan 500 portugés sira tama mai Timor no tinan 40 deklarasaun independénsia, iha finál tinan ne’e.

"Liu hosi portugés sira tama mai ami marka konstrusaun ba identidade foun  timoroan nian", nia hatutan.

Tuir Alkatiri to’o oras ne’e adjudika ona projetu dezenvolvimentu ba rejiaun ho valór totál liu hosi dólar millaun 100, ne’ebé inklui estrada ho kilómetru 50 "ponte bo’ot dahuluk Timor-Leste nian, ho metru 400 ", monumentu ida iha Lifau, iha ne’ebé portugés sira to’o no otel ida.

Obra ne’ebé aranka iha tempu badak no ne’ebé sei soma hafoin kontratu besik dólar millaun 40 ba aeroportu internasionál Oe-Kusse nian.

Fo hanoin katak iha fulan Juñu tinan kotuk aprova ona kriasaun ba Rejiaun Administrativa Espesiál Oe-Kusse Ambenu no instituída Zona Espesiál Ekonomia Sosiál Merkadu, ne’ebé mós koñesidu hanesan ZEESM.

"Oe-Kusse Ambenu hasoru dezafiu ba dezenvolvimentu signifikativu, sai bo’ot tanba nia izolamentu iha relasaun ho teritóriu Timor-Leste. Tuir lei, objetivu Rejiaun Administrativa Espesiál nian maka konsege dezenvolvimentu inklusivu rejiaun nian, fo prioridade ba atividade natureza sósioekonómicka ho forma hodi promove kualidade moris no bem-estar komunidade nian", refere Governu ne’e.

Alkatiri destaka katak autoridade hili iha "abordajen integrada ba dezenvolvimentu sosiál no ekonómiku sustentável", no atinji liu-hosi "investimentu iha formasaun, edukasaun no saúde, nune’e mós iha infraestrutura, hanesan estrada, ponte, eskolas no sira seluk tan".

"Orsamentu ba tinan 2015 fahe dólar millaun 81,9 ba Autoridade hodi investe ho forma atu halais dezenvolvimentou ekonómiku inkluzivu no dezenvolve infraestrutura bázika. Rejiaun ne’e sei uja nia estatutu Zona Ekonómicka Espesiál hodi atrai investimentu estranjeiru ho kualidade", refere Governu ne’e.

Sapo TL ho Lusa

Comentários

Critério de publicação de comentários