Pájina aktualizada iha 08:01h, domingu 19 Novembru

Mate ona ministru Edukasaun Fernando Lasama de Araújo

02 de Junho de 2015, 12:25

Eis-visi-primeiru ministru Timor-Leste nomós hanesan atuál ministru Edukasaun Fernando Lasama de Araújo, mate ona ohin iha Ospitál Dili, tuku 08:30 ho tinan 53, hafoin kona “stroke” no nia mós dedika ona ninia moris tomak hodi luta ba ukun rasik-aan Timór nian.

Foto: Samuel Soares @SAPO TL

Fernando Lasama de Araújo mate ohin iha Ospitál Dili, iha sekuénsia tromboze ho “derrame cerebral”.

Lasama moris iha Manutasi, munisípiu Ainaro, bainhira sei ho idade 12 nia sai nu’udar testamuña ba masakre ne’ebé militár indonézia halo ba família 18, no masakre ne’e maka hamosu ninia kompromisu polítika.

Uluk hanesan fundadór no sekretáriu-jerál Renetil, organizmu juvenil rezisténsia timoroan, ho objetivu inskritu iha proklamasaun 20 juñu 1988 "izola pronta no lais estudante hotu Timor-Leste nian hosi influénsia ideolójika, polítika, ekonómika no sosiokulturál ne’ebé dezenvolve hosi governu fasista-militarista Jakarta nian".

Prezu durante okupasaun indonézia, iha 1991, no julgadu tanba krime kontra Estadu, Lasama de Araújo tama kadeia durante tinan neen fulan haat iha kadeia Cipinang, iha Jakarta, fatin iha ne’ebé  mós hela líder istóriku rezisténsia timoroan, Xanana Gusmão.

"Iha Cipinang maka ha’u aprende ho Xanana no prizioneiru polítiku sira seluk. Ha’u nia formasaun polítika mai hosi Cipinang", nia hatete iha loron ida.

Pasa mós hosi kadeia seluk, iha Bali no iha Java, igualmente iha Indonézia, no konsideradu hanesan "prizioneiru ho konsiénsia" hosi Amnistia Internasionál.

Aliás, organizasaun defeza direitu umanu ne’e liga ho nia moris tomak, tanba iha prizaun maka nia koñese ida ne’ebé sai hanesan nia kaben, filipina Jacqueline Aquino Siapno, respeitada akadémika ne’ebé iha altura ne’ebá servisu ba Amnistia Internasionál, no ida ne’ebé sira iha oan ida.

Iha tinan 1992, nia simu Prémiu Internasionál Reebok tanba hala’o atividade hodi defende direitu timoroan sira nian, hosi okupasaun indonézia.

Lasama de Araújo kandidata-aan dala rua ba eleisaun prezidensiál, iha tinan 2007 no 2012, maibé liuhosi lideransa Partidu Demokrátiku no nomeadu hanesan prezidente parlamentu iha tinan 2007, hafoin iha 2012 asumi kargu vise-primeiru-ministru iha Governu koligasaun ho partidu Xanana Gusmão nian.

Figura daruak Estadu nian, "La Sama" substitui, iha 2008, Prezidente Repúblika, José Ramos-Horta, kanek iha atake iha loron 11 fevereiru, sai hanesan prezidente hodi hala’o funsaun durante fulan rua.

SAPO TL ho Lusa

Comentários

Critério de publicação de comentários