Pájina aktualizada iha 12:15h, tersa-feira 18 Juñu

Biografia badak kona-bá Fernando Lasama de Araújo

05 de Junho de 2015, 09:12

Fernando Lasama de Araújo mate ona iha loron-tersa ne'e iha Ospitál Díli ho tinan 53. SAPO Timor-Leste hamutuk ho ajénsia Lusa halo rezumu badak kona-bá nia atividade iha polítika durante luta ba independénsia Timor-Leste.


Fernando Lasama de Araújo moris iha Manutasi, munisípiu Ainaro, bainhira iha tinan 12 nia sai nu’udar sasin ba masakre nebe militár indonéziu halo ba família hamutuk 18, no masakre ne’e maka hamosu ninia kompromisu polítika.

Hanesan fundadór no sekretáriu-jerál Renetil, organizmu juvenil rezisténsia timoroan, ho objetivu nebe hakerek iha proklamasaun 20 fulan-juñu 1988 "halibur lalais estudante sira hosi Timor-Leste hosi influénsia sira ideia, polítiku, ekonómiku no sosiokulturál nebe dezenvovle hosi governu fasista-militarista Jakarta nian".

Prezu durante okupasaun indonézia, iha 1991, no hetan julgamentu tanba krime kontra Estadu, Lasama de Araújo tama kadeia durante tinan neen fulan haat iha kadeia Cipinang, iha Jakarta, fatin iha nebe mós hela líder istóriku rezisténsia timoroan, Xanana Gusmão.

"Iha Cipinang maka ha’u aprende ho Xanana no prizioneiru polítiku sira seluk. Ha’u nia formasaun polítika mai hosi Cipinang", nia hatete iha loron ida.

Liu mós hosi kadeia sira seluk, iha Bali no iha Java, iha Indonézia, no konsideradu hanesan "prizioneiru ho konsiénsia" hosi Amnistia Internasionál.

Organizasaun defeza direitu ema nian ne’e iha nafatin ligasaun ho nia moris, tanba iha kadeia maka nia koñese ona feto nebe sai nu'udar nia kaben, Jacqueline Aquino Siapno, akadémiku ida nebe respeitadu no iha tempu ne'ebá serbisu ho Amnistia Internasionál, no sira na'in rua iha oan-mane na'in ida.

Iha tinan 1992, nia simu Prémiu Internasionál Reebok tanba nia atividade hodi defende direitu timoroan sira nian, durante okupasaun indonézia.

Lasama de Araújo sai kandidatu dala rua ba eleisaun prezidensiál, iha tinan 2007 no 2012, maibé liuhosi lideransa Partidu Demokrátiku maka hetan nomeasaun nu'udar prezidente parlamentu iha tinan 2007, nebe hafoin iha tinan 2012 maka kaer knaar nu'udar visi-primeiru-ministru iha Governu koligasaun ida ho partidu Xanana Gusmão nian.

Figura daruak Estadu nian, "La Sama" substitui, iha 2008, Prezidente Repúblika, José Ramos-Horta, nebe hetan kanek iha atake iha loron 11 fevereiru, sai hanesan prezidente hodi hala’o funsaun durante fulan rua.

SAPO TL ho Lusa

 


Comentários

Critério de publicação de comentários