@SAPO TL
Adérito Hugo da Costa ko’alia ba Lusa hafoin eleitu hosi votu mairoia, hodi troka Vicente da Silva Guterres ne’ebé ohin tuun ona hosi ninia kargu, molok halo votasaun.
"La’os vitória, nomós derota ida. Ami hotu nu’udar kompañeiru hosi partidu ida”, tenik Adérito Hugo da Costa, hodi sauda konfiansa hosi ninia partidu (CNRT) nomós kolaborasaun hosi bankada Fretilin hodi “garante atu funsionamentu hosi Parlamentu Nasionál kontinua la’o nomós ba estabilidade governativa”.
Hanesan prosesu ida ne’ebé la’os muda de’it meza parlamentu, maibé koriji mos aspetu hosi rejimentu parlamentár, no hatutan tan katak maski ho durasaun naruk, maibé fó de’it impaktu ba serbisu normál loron haat nian “sem afeta atividade Parlamentu Nasionál”.
Molok ninia eleisaun, Hugo da Costa konsidera katak alterasaun ba meza ne’e hanesan rezultadu hosi mudansa relasaun polítika entre CNRT ho Partido Democrático no ho desizaun CNRT nian ne’ebé “analiza dezempeñu hosi kuadru partidu ne’ebé asumi kargu públiku”.
"Ita hotu hakruuk ba avaliasaun polítika hosi ita-ninia partidu. Hanesan kuadru partidu nian, ha’u asumi funsaun hothotu ho responsabilidade", dehan.
“Ita tenke serbisu hamutuk ba konstrusaun Estadu, dinamiza instituisaun ne’ebé akompaña ona dezenvolvimentu, ajuda kria lejislasaun ne’ebé kompleta palnu reforma hothotu, polítika desentralizasaun ka buat seluk tan”, nia insisti.
Hafoin ninia diskursu dahuluk hanesan prezidente, Adérito Hugo da Costa garante katak sei halo serbisu ho dignidade kargu ne’e nian, atu nune’e bele garante funsionamentu normál hosi Parlamentu Nasionál, tanba sei iha defisiénsia téknika ne’ebé asembleia hasoru.
Hugo da Costa hatutan kona-ba vontade atu insentiva kalendáriu lejislativu, liu-liu ba iha prosesu desentralizasaun administrativa rai-laran nian ne’ebé lala’o durante tinan barak nia laran.
Jornalista hosi jornál dahuluk Suara Timor Timur (depois ba fali Suara Timor Lorosa’e) nian desde 1993 to’o 2007 no depois ba fali Timor Post, no Adérito Hugo da Costa, ne’ebé ho tinan 47, hosi Same, Manufahi, lisensiadu iha área komunikasaun Sosiál.
Desde 20-jullu-2012 sai nu’udar deputadu, hanesan mos fundadór ba diário Timor Post, prezidente hosi Fundasaun Timor Beran no membru hosi Konsellu Administrasaun Radio Difuzaun Timor-Leste.
Asumi mos kargu nu’udar prezidente Komisaun Jurisdisaun hosi Congresso Nacional de Reconstrução de Timor-Leste (CNRT) no hanesan membru hosi Grupu Amizade Parlamentu Timor-Leste-Japaun.
SAPO TL ho Lusa
Comentários
Critério de publicação de comentários