Pájina aktualizada iha 11:56h, domingu 20 Janeiru

Lansa ona Ajénsia Notisioza Timor-Leste nian (ANTIL) iha loron-kuarta iha Díli

27 de Julho de 2016, 20:19

Ajénsia Notisioza Timor-Leste nian (ANTIL) lansa tiha ona iha loron-kuarta ne'e iha Díli, projetu ida ne'ebé sei formaliza hahú iha fulan-Setembru, ho aprovasaun ba estatutu sira, hatete hosi sekretáriu Estadu Komunikasaun Sosial, Nélio Isaac Sarmento, ba Lusa.


Foto@ SAPO Timor-Leste

"Ohin lansa tiha ona "embriaun" hosi Ajénsia Notisioza Timor-Leste nian (ANTIL), liuhosi portal informasaun ofisial hosi Estadu Timor-Leste nian. Nune'e, hahú ohin, Timor-Lesteiha ona ajénsia ofisial ida, ajénsia notísia ida hodi fó informasaun ba teritóriu tomak Timor-Leste nian no ba mós komunidade timoroan sira iha estranjeiru", hatete hosi Nélio Isaac Sarmento.

"Ajénsia notisioza Timor-Leste nian ne'e halo parte hosi programa Governu nian iha área komunikasaun sosial nian. (...) Iha etapa dahuluk ami kria ona "embriaun" ida ne'ebé signifika katak órgaun ki'ik ida ajénsia nian, no hafoin ne'e iha fulan-Setembru ami aprezenta iha Konsellu Ministru sira enkuadramentu legal, nune'e, estatutu ajénsia nian. Hafoin aprovasaun, "embriaun" sei sai hikas instituisaun ofisial Estadu nian", nia hatutan.

ANTIL moris ho ekipa ida ho ema na'in 20 resin, inklui jornalista na'in hitu ne'ebé hetan ona formasaun durante fulan rua iha Lisboa, iha CENJOR (Centro Protocolar de Formação para Jornalistas).

Ajénsia Lusa aprezenta tiha ona iha tinan 2013 proposta ida parseria luzu-timoroan hodi harii ajénsia notísia Timor-Leste nian.

Aleinde parseria ida ho Lusa, prepara daudaun "programa estratéjiku sira hosi ajénsia hodi hahú aumenta rede jornalista sira nian, liuliu iha nasaun sira membru CPLP nian [Komunidade hosi Nasaun sira Lian Portugés nian] no iha nasaun sira ASEAN nian [Asosiasaun hosi Nasaun sira Sudeste Aziátiku nian]", hatete hosi Nélio Isaac Sarmento.

"Hafoin lansamentu hosi "embriaun" ANTIL nian, diretór hosi ajénsia notísia sira sei ko'alia ho Lusa no ho ajénsia sira seluk hosi nasaun sira CPLP nian hodi hahú koperasaun ida no troka informasaun", nia hatutan.

Sekretáriu afirma ona katak parseria ho Lusa ajuda "fó asisténsia ho hadi'a produtu jornalístiku hosi Ajénsia Notísioza Timor-Leste nian".

Lansamentu hosi ajénsia notisioza Timor-Leste nian antes hanoin ba tinan 2014, tanba okaziaun hosi simeira CPLP nian iha Díli, maibé iha tempu ne'ebá laiha posibilidade tanba laiha kondisaun sira iha nível rekursu ema nian no ekipamentu sira, haktuir hosi esplikasaun Nélio Isaac nian.

Agora daudaun, bele hetan asesu ba ANTIL liuhosi portal no hosi aplikasaun ida ba 'smartphone'.

Primeiru-ministru, Rui Maria de Araújo, no membru sira hosi Governu no emprezáriu sira inklui operador telekomunikasaun sira TELKOMCEL marka ona prezensa iha serimónia lansamentu ne'ebé hala'o iha loron-kuarta ne'e iha Díli.

"Tanba objetivu fundamental hosi ajénsia maka buka apoiu finansiamentu rasik hodi labele depende liu ba Orsamentu Jeral hosi Estadu", nia hakotu.

ho Lusa

 


Comentários

Critério de publicação de comentários