Pájina aktualizada iha 10:21h, tersa-feira 23 Maiu

Mundu lakon konstrutor demokrasia nian no ezemplu toleránsia - PR timoroan

09 de Janeiro de 2017, 20:35

Iha loron-segunda ne'e, Prezidente timoroan Taur Matan Ruak konsidera katak Mário Soares nia mate reprezenta lakon "ema ida ne'ebé harii demokrasia" no ema ida ne'ebé sei sai nafatin hanesan ezemplu inspirador ba toleránsia ba jerasaun foun sira.


Prezidente Repúblika timoroan, Taur Matan Ruak, fó Grande-Colar hosi Ordem de Timor-Leste, kondekorasaun aas liu hosi nasaun ne'e ba ema estranjeiru sira, ba antigu Prezidente Repúblika portugés Mário Soares (simu hosi nia oan-mane João Soares), iha loron 28 Outubru 2016, iha serimónia ne'ebé halo iha otel ida iha Lisboa. Foto@ Manuel de Almeida /EPA/Lusa

"Timor-Leste lakon ona belun boot ida. Timoroan sira sei la haluha solidariedade ne'ebé estadista portugés koñesidu ne'e hatudu ona mai ami, durante tinan barak luta ba libertasaun nian", refere iha karta kondolénsia ne'ebé maka Taur Matan Ruak haruka ona ba João Soares, Mário Soares nia oan-mane boot.

"Ha'u hakarak transmiti ba ita no ba família tomak ne'ebé iha lutu, sentidu kondolénsia ba Dr. Mário Soares nia mate, ne'ebé ha'u simu koñesimentu ho laran-triste tebes no ho konsternasaun", refere iha karta ne'e.

Líder timoroan hanoin hikas katak bainhira Mário Soares nu'udar Prezidente Repúblika, nia "tau nafatin ba dahuluk planu direitu timoroan sira nian ba autodeterminasaun no bolu atensaun ba responsabilidade sira hosi komunidade internasional hodi harii kondisaun sira hodi hala'o direitu ne'e".

Ho "kapasidade diplomátiku no polítiku rekoñesidu no autoridade demokrata ida ne'ebé insubstituível", Mário Soares "ajuda ona hatama iha ajenda internasional asuntu kona-ba violasaun maka'as no sistemátiku hosi Direitu Ema nian hosi ami nia povu nian".

Taur Matan Ruak hakarak destaka mós Mário Soares nia importánsia iha planu internasional hodi konsidera katak ho nia mate "mundu lakon mós ema ida ne'ebé harii demokrasia no lutador maka'as no determinadu ida".

Mário Soares nia kombate sira "hodi defende toleránsia, diálogu no ezersísiu hosi sidadania inspira ona jerasaun sira portugés sira nian no husik marka klean iha istória Portugal no Europa nian", Prezidente timoroan refere mós.

"Mário Soares nia memória, bainhira hanesan ativista demokrasia nian no estadista, no nia susesu sira no realizasaun notável sira sei sai nafatim hanesan inspirasaun maka'as ba jerasaun foun sira, bainhira presiza afirma vivénsia hosi sosiedade abertu sira no tolerante sira, hasoru violénsia no extremizmu", hatete mós iha karta kondolénsia nian.

Prezidente Repúblika timoroan, Taur Matan Ruak, iha tinan liubá fó ona ba Mário Soares Grande Colar hosi "Ordem de Timor-Leste", hanesan "koñesimentu maka'as" ba "solidariedade no apoiu ativu" iha luta ba independénsia nian.

Iha serimónia ida iha Lisboa iha fulan-Outubru liubá, ne'ebé kondekora mós Jorge Sampaio, líder timoroan hatudu ona "rekoñesimentu klean ba humanizmu, ba espresaun oioin solidariedade nian no apoiu ativu ne'ebé maka Soares ho Sampaio, iha tinan barak nia laran, alimenta ona luta ba liberdade, autodeterminasaun no independénsia Timor-Leste nian".

Mário Soares mate ona iha Hospital Cruz Vermelha, iha Lisboa, ne'ebé hanesan fatin nia internadu durante loron 26, hahú hosi loron 13 Dezembru liubá.

Governu portugés dekreta ona lutu nasional loron tolu, hahú hosi loron-segunda.

Antigu Prezidente Repúblika nia mate-isin sei tama iha Mosteiro dos Jerónimos iha tuku 13:00 (oras Lisboa nian) no sei hakohi iha loron-tersa tuku 15:30 (oras Lisboa nian) iha Cemitério dos Prazeres, iha Lisboa.

Mário Alberto Nobre Lopes Soares moris iha loron 07 Dezembru 1924 iha Lisboa, advogadu, kombate ona hasoru ditadura Estado Novo no hanesan fundador no líder dahuluk PS nian.

Hafoin revolusaun loron 25 Abril 1974, nia fila hosi ezíliu iha Fransa no sai nu'udar ministru Negósiu Estranjeiru no primeiru-ministru entre tinan 1976 no 1978 no entre tinan 1983 no 1985, husu adezaun Portugal nian ba Komunidade Ekonómiku Europeiu nian (CEE) iha tinan 1977 no asina tratadu ne'e iha tinan 1985.

Iha tinan 1986, nia manán eleisaun prezidensial sira no sai ona nu'udar Prezidente Repúblika durante mandatu rua to'o tinan 1996.

ho Lusa

 


Comentários

Critério de publicação de comentários