Pájina aktualizada iha 14:17h, sabado 19 Agostu

Parlamentu Nasional timoroan aprova suspensaun ba tratadu 2006 nian kona-ba Tasi Timor

14 de Janeiro de 2017, 00:15

Parlamentu Nasional aprova iha loron-tersa ho unanimidade no iha reuniaun privadu rezolusaun ida ne'ebé formaliza intensaun Timor-Leste nian hodi suspende Tratadu kona-ba Determinadu Ajuste Marítimu sira iha Tasi Timor (CMATS iha nia sigla ho lian inglés).


Aprovasaun ba rezolusaun, ne'ebé seidauk fó sai ba públiku, formaliza intensaun ne'ebé Governu timoroan fó sai hodi suspende tratadu ne'ebé asina iha tinan 2006 ho Austrália, no ne'ebé hala'o tratadu orijinal ne'ebé asina iha loron 20 Maiu 2002.

Iha loron-segunda, Governu timoroan ho australianu fó sai ona komunikadu hamutuk ida - ho rekoñesimentu hosi Komisaun Konsiliasaun ONU nian ne'ebé hanesan mediador entre parte rua ne'e - kona-ba suspensaun hosi tratadu ne'ebé orienta rejiaun fronteira ne'ebé agora daudaun iha problema, iha Tasi Timor.

"Governu Timor-Leste desidi entrega ba Governu Austrália notifikasaun ida hosi karta kona-ba nia intensaun hodi hapara Tratadu 2006 kona-ba Determinadu Ajuste Marítimu sira iha Tasi Timor, iha termu sira nº 2 hosi artigu 12º hosi tratadu ne'e", refere hosi nota hamutuk ida ne'ebé haruka ba Lusa.

"Governu Austrália simu ona intensaun ne'e no rekoñese katak Timor-Leste iha direitu hodi hahú hapara tratadu. Nune'e, Tratadu relativu ba dispozisaun marítimu balun iha Tasi Timor nian sei hapara hahú hosi fulan tolu hafoin hosi loron notifikasaun ne'e nian", nia hatete.

Iha deklarasaun sira ba Lusa iha loron-segunda ne'e, ministru Negósiu Estranjeiru timoroan nian, Hernâni Coelho, hatete katak nasaun rua ne'e senti komprometidu no halo negosiasaun ho laran di'ak hodi hetan akordu ida kona-ba solusaun definitivu ida ba fronteira tasi sira nian.

"Ami partisipa ho dalan pozitivu iha prosesu tomak. Dalaruma bele iha susar tékniku maibé ita bele haree laran di'ak hosi parte rua hodi ultrapasa difikuldade no avansa hodi hetan solusaun loloos ida ba prosesu ne'e", nia hatete.

Timor-Leste ho Austrália partisipa, hahú hosi tinan liubá no iha insisténsia hosi Díli, iha prosesu ida konsiliasaun nian ho baze iha Konvensaun ONU nian kona-va Direitu Tasi nian, ne'ebé iha objetivu hodi "rezolve diferensa sira entre Estadu rua ne'e kona-ba fronteira tasi sira nian iha Tasi Timor".

Notifikasaun timoroan nian kona-ba suspensaun CMATS nian halo parte iha pakote ida hosi medida oioin ne'ebé Timor-Leste ho Austrália konkorda ona, iha diálogu oioin ne'ebé halo entre loron 10 no 13 Outubru, "hodi fasilita prosesu konsiliasaun nian no harii kondisaun adekuadu sira hodi hetan akordu ida kona-ba fronteira tasi sira permanente iha Tasi Timor".

Timor-Leste fó sai tiha ona, iha sesaun dahuluk hosi komisaun konsiliasaun nian, iha fulan-Agostu iha Haia, intensaun hodi hapara CMATS tanba konsidera katak akordu ne'e la kumpri nia objetivu.

Antes ne'e, Díli deklara ona akordu inválidu tanba atividade sira espionajen ne'ebé halo hosi Austrália.

Austrália, ho kobertura hosi programa ida tulun humanitáriu nian, instala ona ekipamentu hodi halo espionajen iha gabinete sira hosi membru sira Governu timoroan nian, grava konversa sira kona-ba negosiador timoroan sira ne'ebé envolve iha preparasaun CMATS nian.

ho Lusa


Comentários

Critério de publicação de comentários