Pájina aktualizada iha 13:00h, kuarta-feira 22 Fevereiru

PM timoroan apela ba profisionalizmu ho imparsialidade hosi funsionáriu eleitoral sira

15 de Fevereiro de 2017, 23:51

Primeiru-ministru timoroan apela ona, iha loron-kuarta ne'e, ba funsionáriu eleitoral sira hodi kumpri sira nia funsaun ho "profisionalizmu ho imparsialidade" hodi garanti katak eleisaun prezidensial sira hala'o tuir lei, asegura direitu sira ba sidadaun sira.


Primeiru-ministru halo vizita surpreza iha loron-kuarta ne'e iha Sekretariadu Tékniku hosi Asisténsia Eleitoral (STAE) iha Díli. Foto@ Gabinete do Primeiro-Ministro de Timor-Leste

Apelu ne'e husik hosi Rui Maria de Araújo ba grupu ida funsionáriu eleitoral sira ne'ebé iha loron-kuarta ne'e simu formasaun iha Sekretariadu Tékniku hosi Asisténsia Eleitoral (STAE), ne'ebé hetan vizita surpreza iha loron-kuarta hosi primeiru-ministru.

"Ha'u halo apelu espesial ida ba funsionáriu sira STAE nian, dezde funsionáriu sira iha sede ba "brigadista sira" no funsionáriu eleitoral sira, hodi atua ho profisionalizmu no imparsialidade, garanti katak hala'o sira nia knaar sira, respeita lei no ho rigor", nia afirma.

Hanesan sidadaun, sira iha direitu ba sira nia eskolla ba kandidatu no partidu, maibé hanesan funsionáriu sira Estadu nian tenki garanti nafatin imparsialidade no profisionalizmu hodi halo funsaun eleitoral sira, nia fó hanoin.

Vizita surpreza loron-kuarta ne'e permiti ona, tuir xefe Governu, rona problema sira ne'ebé STAE hasoru iha prosesu preparasaun tékniku ba eleisaun prezidensial sira iha loron 20 Marsu no ba lejislativu sira ne'ebé previstu ba fulan-Jullu.

"Governu iha responsabilidade boot ida hodi garanti katak órgaun sira administrasaun eleitoral nian iha meiu no kondisaun sira hodi organiza eleisaun sira, ba prezidensial sira no mós jeral sira", nia hatete ba funsionáriu sira durante vizita ne'ebé akompaña mós hosi ministru Administrasaun Estatal, Dionisio Babo no hosi diretór-jeral STAE, Acilino Manuel Branco.

Rui Araújo, kompromete hodi rezolve problema sira ne'ebé hasoru, hatete ona katak ema timoroan sira tenki senti orgullozu ho dalan oinsá halo prosesu eleitoral sira, ho destake ba eleisaun lokal sira ne'ebé foin halo (hosi fulan-Outubru no fulan-Novembru tinan liubá).

Aleinde ne'e, destaka mós apoiu ne'ebé autoridade eleitoral timoroan sira, hamutuk ho Ministériu Administrasaun Estatal (MAE) fó nafatin ba prosesu eleitoral sira iha Guiné-Bissau ho iha São Tomé & Prínsipe.

Iha deklarasaun sira ba Lusa, hafoin vizita, Rui Araújo explika katak susar boot sira ne'e maka seidauk iha posibilidade adapta regulamentasaun ba alterasaun sira ba Lei Eleitoral ba Prezidente Repúblika.

"Iha problema ida adaptasaun ba regulamentasaun konsistente ho lei ne'ebé foin aprova, liuliu ba lei hosi eleisaun prezidensial sira nian. Ami hein hela atu prezidente promulga lei hodi nune'e ami bele adapta ba regulamentasaun no, hahú hosi ne'e fasilita serbisu lojístiku STAE nian", nia explika.

Parlamentu Nasional aprova de'it ona alterasau ba lei eleitoral loron 31 Janeiru, bainhira hahú ona prazu ba aprezentasaun hosi kandidatura sira no ba aspetu sira seluk hosi kalendáriu eleitoral nian.

Iha aspetu sira seluk, alterasaun regulamenta posibilidade atu ema timoroan sira ne'ebé hela iha Austrália ho iha Portugal bele vota iha eleisaun prezidensial sira, hanesan ba dala uluk maka akontese.

Rui Araújo hatete katak problema seluk maka "iha ligasaun ho dezembolsu. hosi fundu sira", "aspetu ida jestaun ne'ebé sei rezolve" lalais, nia garanti.

"Iha aspetu jeral STAE ho apoiu hosi MAE hatudu nafatin profisionalizmu no rigor iha sira nia serbisu. Governu iha responsabilidade hodi garanti atu eleisaun sira ne'e iha susesu, liuliu hosi parte lojístiku no tékniku. Ami sei halo posibilidade tomak atu alkansa susesu ne'e", nia afirma.

ho Lusa

 


Comentários

Critério de publicação de comentários