Pájina aktualizada iha 00:44h, segunda-feira 22 Agostu

Ró xinés sira kaer tubaraun tonelada sanulu resin iha bee timoroan nian

18 de Fevereiro de 2017, 01:24

Ró xinés sira ne'ebé hala'o daudaun operasaun, ho lisensa, iha bee timoroan sira nian halo ona peska iha fulan hirak ikus ne'e ba tubaraun ka ikan-gama pelumenus tonelada 40, ikan ne'e hanesan protejidu iha lei timoroan sira nian, hatete hosi organizasaun ambientalista sira nian.


Imajen sira hosi vídeo ne'ebé hetan iha loron 10 Fevereiru, ne'ebé maka Lusa iha asesu, hatudu ró-tiha boot sira xinés nian ne'ebé uza rede iha besik tasi-ibun norte Timor-Leste nian, ho ró-tiha haat hakbesik ba ró prinsipal, ho dimensaun boot, hodi depozita animal sira ne'ebé sira kaer.

Autor sira hosi imajen sira lakohi fó sai identidade.

Imajen sira hatudu depózitu ida nia laran hosi ró prinsipal ne'ebé bele haree de'it ikan tubaraun, hamosu preokupasaun maka'as entre organizasaun ambientalista sira kona-ba ró sira ne'e halo peska ba animal sira ne'ebé hetan protesaun hosi lei timoroan nian.

Fonte sira ne'ebé iha ligasaun ba organizasaun ambientalista rua, Conservation International ho WorldFish, no elementu sira ne'ebé iha ligasaun ho área mergullu refere ona ba Lusa preokupasaun sira kona-ba "ladún iha transparénsia loloos" kona-ba kontratu ne'ebé fó ba empreza ne'ebé opera ró sira ne'e.

Fonte sira hanesan iha mós dúvida kona-ba lisensa ne'ebé fó ba ró xinés sira, ne'ebé halo operasaun iha Timor-Leste hahú hosi fulan-Novembru tinan liubá, no kona-ba laiha implementasaun hosi aspetu sira seluk ne'ebé promete hosi akordu ho empreza.

Bainhira Lusa husu, diretór-jeral hosi Peska, Acácio Guterres, garanti ona katak sei la halo exportasaun ba animal sira, bainhira Lusa hatudu imajen sira hosi vídeo ne'ebé drone halo no hatudu depózitu hosi ró xinés ida ho ikan tubaraun barak.

"Sira halo ona peska bsik tonelada 40. Ami hatete ona katak sei la halo exportasaun", Acácio Guterres garanti ona hafoin haree vídeo maibé la explika saida maka sei akontese ba ikan sira ne'ebé kaer ona ne'e.

Responsável timoroan la konsege explika mós saida maka akontese ba responsável sira hosi ró sira ne'ebé kaer ona animal protejidu sira, liuliu tanba lei ne'ebé hala'o kalkula kastigu kadeia tinan ida to'o tinan lima ba kazu sira ne'e no multa entre dolar 500 no rihun resin.

Fonte sira hosi Ministériu Agrkultura no Peska explika ona ba Lusa katak volume hosi ikan tubaraun ne'ebé kaer bele hanesan "aas tebes" no iha mós animal sira seluk ne'ebé protejidu, hanesan kazu hosi lenuk sira, ne'ebé kaer iha rede sira hosi ró xinés sira.

Joni Freitas, xefe hosi departamentu Kaptura no Lisensiamentu hosi Ministériu Agrkultura no Peska nian hatete ona ba Lusa katak maski hosi espésie sira tubaraun nian hanesan protejidu iha Timor-Leste, animal sira ne'ebé kaer hosi ró-tiha xinés sira nian la halo parte hosi animal lima ne'ebé hetan protesaun iha nível internasional.

Ró sira ne'e pertense ba empreza Pingtan Marine Entreprise, ne'ebé ba Timor-Leste hafoin Ministériu Asuntu Marítimu no Peska indonéziu nian suspende tiha konsesaun ka renovasaun ba lisensa sira peska nian iha tinan 2014.

Acácio Guterres no Joni Freitas, xefe hosi departamentu Kaptura ho Finansiamentu hosi Ministériu Agrikultura no Peska nian, konfirma ona ba Lusa kona-ba informasaun akordu lisensa nina hosi ró hamutuk 15 ne'ebé iha daudaun Timor-Leste.

Hamutuk, empreza selu ona dolar 312.600 ba lisensa sira hosi operasaun no exportasaun iha Timor-Leste ne'ebé permiti ba ró ida-idak halo peska, tinan-tinan, ba tonelada 100 ka tonelada 1.500 entre sira (ekivale besik séntimu 21 tuir kilu ida).

"Ami hakarak aplika folin sira ne'ebé aas tebes maibé ami labele halo tanba ne'e hanesan folin ne'ebé iha lei", Freitas hatete no refere ba dekretu tinan 2005 ne'ebé defini folin sira ne'ebé tenki halo ba peska komersial iha Timor-Leste (entre dolar 80 tuir tonelada ida ba ikan ki'ik sira no dolar 250 ba tonelada ida ba balada sira ne'ebé pertense ba krustáseu - hanesan boek, kadiuk).

Responsável na'in rua ne'e refere ona katak ró sira ne'e hetan inspesaun "fulan tolu dala ida bainhira vizita portu", konfirma ona katak Governu iha de'it "inspetór na'in lima" maibé ladún hatete loloos kona-ba espésie ikan ne'ebé kaer iha verifikasaun ka la'e.

Iha entrevista ba Lusa iha fulan-Novembru - bainhira fó sai detalle sira kona-ba ró sira ne'ebé foin to'o iha bee timoroan sira - Estanislau da Silva, ministru Estadu, Kordenador ba Asuntu Ekonómiku sira no Ministru Agrikultura no Peska, explika ona katak iha garantia atu parte hosi ikan ne'ebé kaer ba iha merkadu nasional.

To'o agora seidauk to'o ikan ida ne'ebé halo parte hosi akordu iha merkadu timoroan nian, no Acácio Guterres explika katak ne'e akontese tanba ró sira ne'ebé halo peska ho kuantidade ne'ebé ki'ik, nune'e nia folin total trimestre nian, "besik tonelada 374" ekivale hanesan 1/4 hosi kuota anual nian.

"Karik iha fulan hirak tuirmai to'o iha merkadu", nia refere maibé la explika nia sirkunstánsia sira.

Seidauk iha posibilidade hodi hetan komentáriu sira seluk hosi ministru Agrikultura no Peska ne'ebé agora daudaun halo hela vizita iha estranjeiru.

ho Lusa


Comentários

Critério de publicação de comentários