Pájina aktualizada iha 03:19h, segunda-feira 28 Marsu

Xefe sira diplomasia hosi Xina ho EUA hasoru malu ba dala uluk dezde eleisaun Trump nian

17 de Fevereiro de 2017, 20:58

Sekretáriu Estadu norte-amerikanu, Rex Tillerson, ho nia homólogu xinés, Wang Yi, hasoru malu iha loron-sesta ne'e iha reuniaun importante entre Xina ho Estadus Unidus hafoin Donald Trump nia eleisaun.


Hafoin eleitu, Trump hahú hamosu protestu oioin hosi Pekin bainhira hahú diskusaun kona-ba ideia "Xina ida de'it", ne'ebé tuir rejimi komunista hanesan garanti ida katak Taiwan halo parte hosi nia teritóriu no la'ós hanesan entidade polítika soberanu ida.

Maibé, magnata konsidera fali ona pozisaun ne'e iha diálogu liuhosi telefone ho Prezidente xiné, Xi Jinping, ne'ebé halo iha semana liubá, hodi loke dalan ba enkontru entre Wang ho Tillerson, iha final hosi simeira G20 ne'ebé halo iha sidade alemaun Bona.

Seidauk fó sai detalle sira kona-ba reuniaun entre sira na'in rua.

Washington iha relasaun la ofisial ho Taipé, hanesan fatin hodi halo exportasaun arma ne'ebé destina hodi proteje illa bainhira Xina uza forsa hodi tenta reunifikasaun.

Hafoin eleitu, Donald Trump hatán ko'alia ho líder Taiwan, Tsai Ing-wen, liuhosi telefone, hodi la halo tuir protokolu diplomasia norte-amerikanu nian ho kuaze tinan 40.

Antes, Wang la konfirma prezensa iha simeira entre ministru sira negósiu estranjeiru sira nian hosi nasaun sira G20. Hafoin telefonema entre Xi ho Trump maka reprezentante xinés ne'e konfirma nia partisipasaun.

Trump deskreve konversa ho Xi hanesan "di'ak tebes", iha situasaun hanesan esforsu hodi hamenus tensaun sira, hafoin akuza tiha Xina halo prátika komersial sira ne'ebé la leal no ladún halo presaun atu Koreia-Norte husik nia programa nuklear.

Membru oioin hosi nia administrasaun, inklui Tillerson, observa mós Pekin kona-ba nia prezensa iha Tasi Súl Xina nian, hodi insisti katak EUA sei hametin sira nia direitu navegasaun nian.

Bainhira fó sai prezensa Wang Yi nian, ministériu xinés hosi Negósiu Estranjeiru afirma ona katak hein atu enkontru G20 "hamosu sinal pozitivu sira bainhira apoia multilateralizmu, hametin governasaun global no kria ekonomia mundial inovadora ida, interkonektadu, nakloke no inkluzivu".

Hafoin funu sivil xineza hotu, ho vitória hosi Partidu Komunista Xina nian (PCC), antigu governu nasionalista (Kuomintang) halai ba illa Taiwan, ne'ebé kontinua identifika hanesan governante hosi Xina tomak.

Pekin konsidera Taiwan hanesan provínsia xineza no defende "reunifikasaun pasífiku" ida, tuir dalan hanesan ne'ebé adopta ba Hong Kong ho Makau ("Nasaun ida, sistema rua"). Maibé, ameasa "uza forsa" bainhira illa ne'e deklara independénsia.

ho Lusa

 


Comentários

Critério de publicação de comentários