Pájina aktualizada iha 14:11h, sabado 16 Dezembru

PM Holanda: Akuzasaun turku kona-ba Srebrenica hanesan "falsidade istóriku ne'ebé la dignu"

15 de Março de 2017, 01:38

Primeiru-ministru Holanda nian, Mark Rutte, konsidera iha loron-tersa ne'e "falsidade istóriku la dignu" ida ba akuzasaun ne'ebé halo hosi Prezidente Turkia nian, Recep Tayyip Erdogan, katak ema holandés sira hanesan responsável sira hosi masakre Srebrenica.


"Nia [Erdogan] estraga nafatin situasaun", Rutte hatete ba ajénsia ANP, hodi hatutan katak akuzasaun hanesan "falsidade istóriku ne'ebé la dignu" ida.

"Ami sei la tuun ba nível ne'e, ami la simu ida", nia hatete.

Rutte hatudu reasaun ba afirmasaun sira ne'ebé Prezidente turku halo iha loron-tersa, ne'ebé hatete katak "personalidade aat" hosi ema holandés sira hanesan koñesidu "hahú hos masakre ba ema bósniu hamutuk rihun ualu iha Srebrenica”.

Forsa sérviu sira oho vítima sira, iha tinan 1995 iha Bósnia, iha zona ida ne'ebé deklaradu seguru hosi kapasete azul holandés sira.

Tensaun aumenta iha loron hirak ne'e entre Turkia ho nasaun oioin europeu sira, entre sira maka Alemaña ho Holanda, tanba opozisaun hosi governu sira ne'e ba prezensa hosi ministru turku sira iha kampaña ho komunidade hodi defende "sim" ba reforsu hosi kbiit prezidensial sira iha referendu turku iha loron 16 Abril.

Iha diskursu loron-tersa iha Ankara, Erdogan akuza ona nasaun rua ne'e hanesan Estadu ne'ebé proteje terorista sira.

Berlin reaje ona hodi kualifika hanesan "la sensatu" akuzasaun ne'ebé hatete katak Alemaña subar terorista kurdu sira no afirma katak Erdogan hakarak aumenta de'it apoiu ba "sim" iha referendu.

"Afirmasaun ne'e tau hamutuk ho afirmasaun sira seluk ne'ebé hanesan la sensatu no laiha baze loloos ne'ebé iha de'it objetivu úniku hodi tau Turkia iha fatin vítima nian hodi hamosu solidariedade no evita hahalo krítika ida iha referendu", hatete hosi ministru Interior alemaun, Thomas de Maiziere.

Kona-ba lista hosi terorista kurdu na'in 4.000 ne'ebé deskonfia subar iha Alemaña, ne'ebé Ankara afirma ona katak entrega ona ba xanxeler alemã, Angela Merkel, ministru hatete katak "laiha ezisténsia ba lista ne'e".

Nia hatutan katak "Lia loos maka iha tinan hirak ikus ne'e loke ona iha Alemaña prosesu hamutuk 4.000 relasionadu ho terorizmu iha Turkia".

ho Lusa

 


Comentários

Critério de publicação de comentários