Pájina aktualizada iha 14:06h, kinta-feira 27 Abril

Ema timoroan sira hili Prezidente dahaat dezde restaurasaun independénsia nian

20 de Março de 2017, 22:57

Iha loron-segunda ne'e, ema timoroan sira hili prezidente dahaat dezde restaurasaun independénsia Timor-Leste nian, iha 2002, hili entre kandidatu na'in haat, entre sira maka feto na'in ida.


Urna sira loke ona entre tuku hitu dadeer to'o tuku tolu loraik (oras lokal) loron-segunda ne'e, hodi bele vota no bainhira taka urna bele vota de'it eleitor sira ne'ebé iha ona fila hein nian.

Kandidatu ne'ebé manán tenki hetan votu liu 50% hosi votu válidu sira no, bainhira la akontese, bele halo votasaun daruak iha loron 20 Abril, ho vensedor hosi eleisaun simu pose iha loron 20 Maiu, iha aniversáriu ba dala 15 hosi restaurasaun independénsia nasaun nian.

Ne'e hanesan xefe Estadu ba dala haat hafoin Xanana Gusmão (2002-2007), José Ramos-Horta (2007-2012) no Taur Matan Ruak (2012-2017).

Eleitor timoroan sira tama iha períudu reflesaun hahú loron-sesta meia-noite (oras lokal) bainhira hakotu kampaña no bele aproveita findesemana hodi ba iha rejiaun ne'ebé sira sai hanesan resensiadu.

Governu timoroan fó ona toleránsia pontu ba funsionáriu públiku tomak iha loron eleisaun prezidensial nian no iha loron-tersa ba ema sira ne'ebé maka vota iha sira nia zona no hafoin ne'e bele fila ba sira nia hela fatin.

Desizaun, ne'ebé sei akompaña hosi instituisaun sira iha Timor-Leste, bazeia iha lejislasaun ne'ebé hatete katak toleránsia pontu bele fó "tanba motivu akontesimentu nasional, iha kazu partikular, loron eleitoral ida".

Iha Timor-Leste, ne'ebé bele vota sidadaun sira ho tinan boot liu tinan 17, rejista ona eleitor sira hamutuk 743.150 iha munisípiu 13 iha nasaun, ne'ebé tau hamutuk ho sentru votasaun úniku tolu ne'ebé rejista iha estranjeiru: na'in 886 iha Austrália (na'in 228 iha Darwin no na'in 658 iha Sydney) no na'in 507 iha Lisboa, tuir informasaun ne'ebé Lusa hetan hosi Sekretariadu Tékniku Administrasaun Eleitoral (STAE) no hosi Embaixada Timor-Leste nian iha Portugal.

Asaun eleitoral sira iha tinan ne'e sei hanesan votasaun dahuluk hosi ema timoroan sira iha estranjeiru, liuliu iha Portugal ho Austrália, inisiativu ida ne'ebé Governu hakarak aumenta iha futuru.

Eleisaun prezidensial sira sei iha meza votu hamutuk 944 iha sentru votasaun hamutuk 696, nune'e aumenta kontratasaun ba funsionáriu rihun 10 resin ba akompañamentu eleitoral.

Sei iha mós "votasaun ambulante" iha ospital neen iha nasaun laran - hospital nasional Guido Valadares iha Díli no hospital referénsia sira iha Ainaro, Baucau, Bobonaro, Kovalima ho Oecusse - no iha fatin prisional sira iha Gleno ho Bekora.

Ba asaun eleitoral sei kontrata brigada hamutuk na'in 693 - responsável ida ba sentru votasaun ida - no ofisial eleitoral na'in 9.410, na'in sanulu ba meza votu ida.

Prosesu eleitoral sira iha tinan ne'e iha orsamentu hamutuk dolar millaun sanulu ba STAE, ne'ebé tau hamutuk millaun 1,5 ba Forsa sira Defeza nian (F-FDTL) no millaun 2,5 ba polísia (PNTL).

Kontajen votu sira nian, ne'ebé hahú bainhira taka urna sira, sei halo iha sentru votasaun ida-idak no hafoin ne'e komunika ba STAE ne'ebé sei fó koñesimentu ba CNE.

Nível tuirmai hosi kontajen maka "asembleia hosi apuramentu munisipal" ne'ebé tuir regulamentu hahú funsiona bainhira simu "pelumenus rejistu lima ne'ebé koresponde ba sentru sira votasaun nian".

Informasaun progresivu sei fó sai iha tempu real iha sede CNE nian iha Díli ne'ebé sei funsiona sentru ida imprensa nian hodi apoia jornalista sira ne'ebé akompaña votasaun.

Rezultadu ikus sei bele demora to'o oras 72 nia laran hafoin taka urna sira.

ho Lusa

 


Comentários

Critério de publicação de comentários