Pájina aktualizada iha 03:27h, segunda-feira 28 Marsu

Lu-Olo mantén lideransa ho 59,24%, bainhira sei konta de'it 34,34%

21 de Março de 2017, 01:22

Francisco Guterres "Lu-Olo", kandidatu ne'ebé apoia hosi partidu boot rua timoroan nian, Fretilin ho CNRT, lidera kontajen votu sira iha eleisaun prezidensial timoroan nian ho 59,24% hosi votu sira bainhira sei konta de'it 34,34% hosi votu sira, haktuir hosi informasaun ofisial sira.


Foto@ António Dasiparu/ EPA

Iha tuku 00:00 oras lokal, liutiha oras ualu hafoin taka urna sira, Sekretariadu Tékniku Administrasaun Eleitoral (STAE) rejista ona iha tabela informasaun hosi sentru votasaun hamutuk 239 entre 696, seidauk inklui mós informasaun hosi parte oioin nasaun nian.

Informasaun sira inklui hosi munisípiu sira ne'ebé sei iha kontajen sira ne'ebé la hanesan, no to'o agora konta ona votu hamutuk 167.316(hosi total ida eleitor hamutuk 743.150) hosi votu sira ne'ebé konsideradu válidu hamutuk 163.755.

Hodi manán volta dahuluk, Lu-Olo tenki hetan liu 50% hosi votu válidu sira.

Iha oras ne'e, Lu-Olo hetan ona votu 97.012 (59,24%) hasoru António da Conceição ho votu 49.232 (30,06%).

Iha fatin datoluk hosi kandidatu na'in ualu ne'ebé aprezenta ona ba votu loron-segunda nian okupa hosi José Luis Guterres ho votu 4.924 (3,01%), tuir Luis Tilman, ho votu 3.623 (2,21%).

José Neves iha votu 3.518 (2,15%), Antonio Maher Lopes ho votu 3.094 (1,89%), Ângela Freitas hetan votu 1.213 (0,74%) no ikusmai Amorim Vieira ho votu 1.139 (0,70%).

Lejislasaun timoroan nian hatete katak kontajen votu sira nian bele demora to'o oras 48 hafoin taka tiha urna sira, nune'e, iha kazu lokal balun, votasaun sei hanaruk liu oras ne'ebé previstu tanba iha partisipasaun maka'as.

To'o agora seidauk iha informasaun global hosi partisipasaun.

ho Lusa

 


Comentários

Critério de publicação de comentários