Pájina aktualizada iha 05:59h, kinta-feira 15 Dezembru

São Tomé e Príncipe adere ba Fórum Makau

30 de Março de 2017, 10:24

São Tomé e Príncipe hahú horisehik halo parte ona ba Fórum ba Koperasaun Ekonómika no Komersiál entre Xina ho Nasaun hirak ne’ebé ko’alia Dalen Portugés (Fórum Makau), tuir informasaun ne’ebé fó sai.

@olp

"Hahú hosi reuniaun ne’e, São Tomé e Príncipe nu’udar nasaun partisipante ida hosi ita-ninia Fórum", tenik sekretária-jerál hosi sekretariadu permanente Fórum Makau, Xu Yingzhen, durante reuniaun ikus ne’ebé aprova nasaun refere ninia partisipasaun, hafoin fulan tolu hakotu relasaun diplomátika ho Taiwan.

Tuir Xu, membru hothotu konkorda ho integrasaun São Tomé nian.

"Ita-ninia Fórum sai kompletu liu tan, tanba nasaun hothotu ne’ebé ko’alia lian portugés hamutuk ho ita iha Fórum ne’e. Ha’u hein katak São Tomé sei hetan benefísiu hosi mekanismu ne’e", dehan.

Kona-ba posibilidade atu Guiné Ekuatoriál halo parte mos iha Fórum, sekretária-jerál hateten katak nia lahatene notísia ruma kona-ba ne’e.

“La’os tema ne’ebé diskuti durante reuniaun refere”, nia hateten.

Pasu tuir mai maka sei eskolla delegadu no partisipasaun iha atividade hothotu.

“Hafoin reuniaun ne’e, sira bele halo parte ativamente iha atividade hothotu hosi sekretariadu permanente nian, maibé hanesan membru foun, sei iha tempu atu estuda no hanoin kona-ba atividade hirak ne’ebé sir abele halo parte ba”, esplika.

Iha loron 20-dezembru, São Tomé e Príncipe hakotu ona relasaun diplomátika ho Taiwan no Repúblika Populár Xina hatene ona. Liu tiha loron neen, Xina fó sai katak halo hikas lasi diplomátika ho nasaun refere.

São Tomé e Príncipe to’o oras ne’e, lahalo parte hosi Fórum Makau tanba kria relasaun ho Taiwan. Fórum Makau ne’ebé harii iha 2003 hosi Pekin, ho ninia Sekretariadu Permanente ida no kada tinan tolu, sempre hala’o reuniaun nivel ministeriál.

Iha Konferénsia Ministeriál V, ne’ebé hala’o iha fulan outubru, lahetan reprezentante ruma hosi São Tomé, maski nasaun refere sei atu halo parte hanesan observadór hosi reuniaun Fórum nian, no iha 2013, foin maka haruka reprezentante ida ho kategoria ministru nian.

Xu Yingzhen dehan tan katak mudansa hodi sede fundu xinés ho dolár rihun milloens ida (euros milloens 930 ba kambiu atuál), aloka ba investimentu hosi no ba universu luzófona nian, iha Makau ne’ebé sei tenke hala’o iha metade dahuluk tinan ne’e.

“Banku Dezenvolvimentu Xina, halo hela diskusaun ho Governu RAEM (Rejiaun Administrativa Espesiál Makau) hodi harii lalais sede prinsipál ba Makau. Ha’u hanoin, iha metade dahuluk tinan ne’e, iha ona ne’e”, nia dehan.

Mudansa hosi sede fundu ba Makau fó sai iha fulan outubru tinan kotuk no hein atu konkretiza iha tinan 2016 ne’e.

Iha fulan janeiru tinan ne’e, diretora-jerál empreza jestaun fundu nian, Jin Guangze dehan katak ekipa refere sei hala’o serbisu “iha área ka aspetu jurídika nian”, atu nune’e bele “konkretiza lalais”.

Fundu ho valór globál dolár rihun milloens ida, to’o oras ne’e aprova ona ba projetu tolu, iha Angola, Mosambike no Brazil.

Projetu konstrusaun hosi instánsia turístika ida iha Kaboverde, ne’ebé sei atu loke jogu iha nasaun ne’e, ne’ebé iha fulan janeiru liu ba emprezáriu Makau David Chow bá iha ne’ebá, durante “faze análize, no besik atu remata ona”, iha ligasaun ho finansiamentu dolár milloens 20.

"Ita atu halo remata ona etapa hothotu, falta de’it maka halo aprovasaun hodi hahú ho projetu ne’e ", dehan Song Feng, diretór-jerál adjuntu hosi departamentu jestaun fundu, iha tempu ne’ebá.

SAPO TL ho Lusa

Comentários

Critério de publicação de comentários