Pájina aktualizada iha 08:16h, domingu 18 Dezembru

Paris eziji reuniaun "urjente" Konsellu Seguransa nian hafoin atake kímiku

04 de Abril de 2017, 23:00

Iha loron-tersa ne'e Fransa eziji ona "reuniaun urjente ida" hosi Konsellu Seguransa ONU nian kona-ba "atake kímiku foun ida ne'ebé todan tebes iha Síria", fó sai hosi ministru fransés Negósiu Estranjeiru nian, Jean-Marc Ayrault.


Iha komunikadu, Jean-Marc Ayrault kondena ona atake - ne'ebé fó sai hosi Observatóriu Síriu ba Direitu Ema nian (OSDH) - hanesan "asaun ida obskuru".

"Informasaun dahuluk sira hatete katak ema barak mate, entre sira maka labarik sira" iha provínsia Idleb, hatete hosi ministru.

Xefe diplomasia franseza hatete ona katak "utilizasaun hosi arma kímiku sira konstitui iha violasaun ida ne'ebé la tolera hosi Konvensaun kona-ba Interdisaun hosi Arma Kímiku sira (CIAC) no sasin foun ida kona-ba violénsia ne'ebé maka povu síriu sai ona hanesan vítima iha tinan barak nia laran".

Nia explika tanba ne'e maka Fransa "eziji konvokatóriu hosi reuniaun ida urjénsia nian hosi Konsellu Seguransa ONU nian".

Xefe diplomasia UE nian, italiana Federica Mogherini, akuza ona diretamente rejimi Bashar al-Assad nian hanesan "responsável prinsipal" ba atake kímiku.

"Ohin, notísia sira hanesan aat tebes. Loos duni katak responsabilidade prinsipal monu iha rejimi" síriu, deklara hosi Mogherini.

Tuir Observatóriu Síriu ba Direitu Ema nian (OSDH), atake aéreu ho gás tóxiku iha Khan Cheikhoun halo ona vítima mortal hamutuk na'in 58, entre sira labarik na'in 11.

ONG, ne'ebé haktuir fonte médiku sira no ativista sira, hatutan ona katak ema balun ne'ebé kanek hosi atake, ne'ebé halo hosi aviaun sira ne'ebé la identifikadu, hatudu sintoma sira asfiksia, muta no susar dada-iis.

Observatóriu hatete mós katak balansu hosi vítima mortal sira bele aumenta tuir númeru hosi ema sira ne'ebé kanek.

Ativista síriu sira hatete katak atake ne'e hanesan ida ne'ebé aat liu ho gás tóxiku iha nasaun iha tinan neen funu sivil nian no hatete katak laiha indikasaun kona-ba gás ne'ebé uza iha atake.

Tuir ativista hanesan, atake iha Khan Cheikhoun, pronvínsia Idleb, mosu hosi bombardeamentu aéreu ida ne'ebé halo hosi governu síriu ka hosi aviasaun rusu.

Opozisaun síriu husu ona ba Konsellu Seguransa ONU nian hodi loke ho urjénsia inkéritu ida kona-ba atake ho "gás tóxiku" ne'ebé, tuir sira hatete, halo hosi rejimi Bashar al-Assad nian iha noroeste nasaun nian.

Parte barak hosi provínsia Idleb hetan kontrolu hosi grupu rebelde sira no islámiku sira, entre sira maka Organizmu Libertasaun Levante, aliansa ne'ebé forma hosi eis-filial síriu Al Qaeda nian.

Iha loron hirak ikus ne'e rejista bombardeamentu oioin, karik ho gás, iha norte Síria nian.

Iha loron 30 Marsu liubá, ema na'in 50 resin kanek ka ho sintoma asfixia nian tanba atake sira ne'ebé halo hosi aviaun sira no helikópteru sira ne'ebé la identifika, balun ho substánsia kímiku sira, iha provínsia Hama, Idleb nia viziñu.

ho Lusa

 


Comentários

Critério de publicação de comentários