Pájina aktualizada iha 12:59h, tersa-feira 17 Outubru

Portugal ho Timor-Leste asina protokolu koperasaun iha patrimóniu arkivu nian

05 de Abril de 2017, 00:26

Governu Portugal ho Timor-Leste asina ona, iha loron-tersa, iha Lisboa, protokolu koperasaun ida hodi rai no divulga patrimóniu arkivu komun nian, tuir ho Ministériu Kultura.


Dokumentu ne'ebé asina, no Lusa hetan asesu, refere katak Arkivu Nasional Timor-Leste nian no Arkivu Nasional Torre do Tombo hosi Repúblika Portugeza nian sei kaer patrimóniu dokumental ne'ebé "nia kontéudu sira bele kontribui hodi estimula troka informasaun sira ne'ebé ezisti hosi arkivu sira ho interese komun nian, ne'ebé konstitui parte integrante hosi memória koletivu no individual hosi nasaun rua ne'e".

Protokolu koperasaun ne'e asina ona hosi ministru Kultura Portugal nian, Luís Filipe Castro Mendes, no hosi ministru Administrasaun Estatal hosi Repúblika Timor-Leste, Dionísio Babo Soares, no serimónia halo iha Arkivu Nasional Torre do Tombo.

Memorandu nia objetivu ida maka transferénsia koñesimentu no formasaun iha área arkivu nian entre nasaun rua ne'e.

Dokumentu hakarak transmiti mós koperasaun ba dijitalizasaun hosi dokumentu sira relasionadu ho istória komun entre nasaun rua ne'e no mós iha área sira seluk ne'ebé konkorda ona entre nasaun rua ne'e.

Nasaun rua ne'e sei insentiva promosaun hosi medida sira ba diagnóstiku hosi nesesidade sira, organizasaun no inventariasaun hosi fundu dokumental sira, nune'e mós dezenvolvimentu no interkámbiu ba peskiza dokumental ho vijilánsia hosi nasaun rua ne'e, liuliu, sira ne'e respeita ba patrimóniu arkivu komun.

Entidade responsável dezignadu sira sei fó kontinuasaun ba prosesu dijitalizasaun hosi fundu dokumental sira, liuliu hosi sira ne'ebé respeita nia istória hanesan, tuir dokumentu ne'e.

Dokumentu ne'e refere katak nasaun rua ne'e sei bele hametin asaun sira divulgasaun nian hanesan kolókiu sira, expozisaun sira, konkursu monográfiku sira no eventu sira ne'ebé iha interese, hala'o iha Timor-Leste no iha Portugal.

Portugal no Timor-Leste sei promove mós projetu komun sira kona-ba realizasaun kandidatura sira ba finansiamentu externu sira.

Nasaun rua ne'e desidi ona insetiva universidade sira no sentru sira investigasaun nian hodi kria no hametin liña sira peskiza nian kona-ba nia istória komun, aleinde aumenta interkámbiu hosi espesialista sira iha área arkivu sira nian.

Ezekusaun hosi protokolu koperasaun sei hela iha kargu Diresaun-Jeral Livru , Arkivu no Biblioteka sira Portugal nian (DGLAB) no hosi Diresaun Jeral hosi Arkivu Nasional Timor-Leste nian.

Protokolu koperasaun ne'e hakarak kontinua halo tuir objetivu sira hosi Komunidade Nasaun sira Lian Portugeza nian (CPLP) ne'ebé refere ba rekuperasaun hosi arkivu istóriku hosi Estadu-membru sira hosi bloku luzófonu no kriasaun ba mekanizmu sira ne'ebé fasilita reprodusaun hosi patrimóniu komun ne'e.

ho Lusa

 


Comentários

Critério de publicação de comentários