Pájina aktualizada iha 22:53h, sabado 24 Juñu

Timor-Leste ho Austrália hasoru malu ho Komisaun iha EUA kona-ba fronteira tasi nian

05 de Abril de 2017, 23:19

Delegasaun sira hosi Timor-Leste ho Austrália hasoru malu, iha fulan-Marsu nia rohan, ho Komisaun Konsiliasaun iha Estadus Unidus hodi rezolve diferensa sira kona-ba fronteira tasi nian iha Tasi Timor, fó sai hosi tribunal arbitrajen iha loron-kuarta ne'e.


Reuniaun sira ne'e, konfidensial, halo iha Washington no "hanesan parte hosi diálogu estruturadu iha kontestu hosi konsiliasaun entre Timor-Leste ho Austrália no dezenvolve hela iha ámbitu hosi Konvensaun ONU nian kona-ba Direitu Tasi nian no iha patrosíniu hosi Tribunal Permanente hosi Arbitrajen nian", tribunal, ho sede iha Haia, Holanda, refere iha komunikadu.

Entre loron 26 no 31 Marsu, "Komisaun hasoru malu ho parte rua hodi ko'alia kona-ba sira nia pozisaun negosiasaun nian no buka identifika área posível sira entendimentu nian", adianta hosi komunikadu.

"Reuniaun sira ne'e iha baze hosi enkontru anterior sira entre Komisaun no ho parte rua ne'ebé halo iha Singapura iha fulan-Outubru 2016 no fulan-Janeiru 2017", hatete.

"Parte rua no Komisaun konkorda ona katak reuniaun sira hanesan produtivu, no afirma fali kompromisu hodi serbisu ba konkluzaun eventual hosi akordu ida kona-ba fronteira tasi nian", nia hatutan.

Embaixador Peter Taksøe-Jensen, ne'ebé prezidi Komisaun, observa ona "difikuldade próprio ba Estadu ida-idak" no hatete katak senti "satisfeitu kona-ba oinsá maka halo reuniaun sira ne'e".

"Akordu hanesan maratona ida, la'ós hanesan 'sprint' ida, no ami sei iha nafatin serbisu hodi halo. Komisaun iha ne'e la'ós atu desidi kona-ba konflitu entre parte sira maibé atu ajuda sira hetan akordu ida ne'ebé justu no alkansável, tuir ho Konvensaun ONU nian kona-ba Direitu Tasi nian. Ami kontinua hasoru malu ho parte sira ho hanoin ida ne'e", nia hatete.

Reuniaun foun sira entre parte rua no Komisaun, iha mós ámbitu konfidensial no ho hanoin atu permiti ambiente favorável ida ba akordu ida, sei hala'o iha tinan ne'e, informa hosi komunikadu maibé lahó loron markadu.

Iha loron 30 Marsu, komisaun parlamentar australianu ida aprova ona negosiasaun sira entre Austrália ho Timor-Leste ba definisaun hosi fronteira tasi nian entre nasaun rua ne'e, rekoñese katak suspensaun hosi tratadu atual ida hanesan hakat importante iha diálogu ne'e.

Rekomendasaun halo ona hosi Komisaun Parlamentar Permanente Konjuntu hosi Tratadu kámara rua Parlamentu australianu nian iha relatóriu hosi inkéritu alargadu kona-ba konsekuénsia sira bainhira hakotu tratadu entre Timor-Leste ho Austrália, ne'ebé aplika iha Tasi Timor.

Iha loron 10 Janeiru, Parlamentu Nasional Timor-Leste nian aprove ona ho unanimidade, iha reuniaun privadu ida, rezolusaun ne'ebé konfirma suspensaun hosi tratadu ne'ebé asina iha tinan 2006 no ne'ebé la hala'o tratadu bilateral orijinal ne'ebé asina iha 20 Maiu 2002.

Notifikasaun timoroan nian hodi hapara tratadu 2006 (CMATS) halo parte iha pakote ida hosi medida sira ne'ebé Timor-Leste no Austrália konkorda ona, iha kontaktu sira ne'ebé hala'o ona entre loron 10 no 13 Outubru, "destinadu hodi fasilita prosesu konsiliasaun no harii kondisaun adekuadu sira hodi hetan akordu kona-ba fronteira marítimu permanente sira iha Tasi Timor".

Iha komunikadu hamutuk ida, fó sai iha 23 Janeiru, Governu rua ne'e kompromete ona hodi serbisu "ho di'ak" hodi hetan akordu permanente ida ba fronteira tasi entre nasaun rua ne'e to'o fulan-Setembru 2017.

ho Lusa

 


Comentários

Critério de publicação de comentários