Pájina aktualizada iha 05:57h, kinta-feira 15 Dezembru

Frelimo konsidera Mosambike ezemplu ekilíbriu jéneru nian iha mundu

06 de Abril de 2017, 22:59

Frelimo, partidu iha poder iha Mosambike, konsidera ona iha loron-kinta ne'e katak nasaun hanesan ezemplu ida iha promosaun igualdade jéneru nian, aponta ba inkluzaun hosi feto sira iha poder oioin hanesan konkista ida ne'ebé tenki sai motivu orgullu nian.


"Feto mosambikanu konkista ona, ho méritu tebes, fatin importante ida iha partisipasaun vida públika no ohin loron reprezenta ho di'ak iha órgaun oioin desizaun nian", porta-vós hosi Frente de Libertação de Moçambique (Frelimo), António Niquice, hatete iha konferénsia imprensa.

Ko'alia kona-ba okaziaun Loron Feto Mosambikanu, ne'ebé selebra iha 07 Abril, Niquice hatete katak nasaun konsege hamenus ona asimetria hosi jéneru nian ba nível hosi poder sentral no lokal sira, Asembleia Repúblika no iha administrasaun justisa nian.

"Feto kaer knaar sira iha órgaun sira reprezentasaun nian, ho dignidade no respeitu, halo Mosambike hanesan ezemplu ida iha konsertu hosi nasaun sira", hatutan hosi porta-vós Frelimo nian.

António Niquice hatutan katak partisipasaun ativu iha moris ekonómiku, inklui iha funsaun sira lideransa nian, hanesan benefísiu seluk ne'ebé nasaun hetan dezde luta ba independénsia nasional, ne'ebé hetan iha loron 25 Juñu 1975.

"Nasaun rejista nafatin konkista importante sira iha nível emansipasaun feto nian, ami hanesan ezemplu ida hosi promosaun ekuidade jéneru nian", hatutan hosi António Niquice.

Kona-ba feto nia knaar iha família, Niquice konsidera preokupante kona-ba violénsia doméstika iha nasaun, insisti iha nesesidade reforsu hosi edukasaun ba harmonia família no sosial.

"Ema hotu, família sira, eskola sira, komunidade sira no relijiaun, ita tenki promove solusaun di'ak ida hosi diskusaun iha família, aposta iha diálogu ba harmonia", hatutan hosi porta-vós Frelimo nian.

Tuir Índise Dezenvolvimentu Humanu (IDH) hosi ONU iha 2016, Mosambike rejista ona pontu 0.574 (iha eskala hosi zero to'o ida) iha Índise Desigualdade Jéneru nian no 0.879 iha Índise Dezenvolvimentu Jéneru nian.

Iha loron 07 Abril hanesan feriadu nasional iha Mosambike, tanba komemora Loron Feto Mosambikanu nian, ne'ebé estabelese hosi Governu Frelimo nian, hafoin independénsia nasional.

Frelimo, iha tempu ne'ebá hanesan partidu úniku, hili loron ne'e hanesan homenajen ba Josina Machel, ne'ebé mate iha loron ne'e, iha tinan 1971, ne'ebé konsidera hanesan símbolu ida luta ba emansipasaun feto nian durante luta hasoru kolonializmu portugés.

Josina Machel iha knaar ativu ida iha mobilizasaun feto nian ba knaar sira ne'ebé tuir tradisaun hanesan fó ba mane sira, durante funu libertasaun nasional nian.

Josina Machel kaer mós knaar ida destake nian bainhira simu no proteje labarik órfaun sira ne'ebé lakon aman-inan durante funu ba independénsia.

Konsidera hanesan asu-wa'in nasional, sai nu'udar feen dahuluk Samora Machel nian, líder ida Frelimo nian durante funu libertasaun nasional nian no ikusmai sai nu'udar Prezidente mosambikanu dahuluk hafoin independénsia.

Lusa

 


Comentários

Critério de publicação de comentários