Pájina aktualizada iha 05:57h, kinta-feira 15 Dezembru

Fonte diplomátika: Mudansa ba vistu australianu sira la afeta programa sazonal

19 de Abril de 2017, 20:22

Alterasaun sira ba rejimi vistu ba traballador estranjeiru sira iha Austrália sei la afeta ema timoroan sira ne'ebé serbisu iha Austrália liuhosi programa serbisu sazonal, garanti ona hosi embaixada Austrália iha Díli ba Lusa.


"Programa sazonal la kona ba vistu sira ne'ebé agora hetan mudansa. Hanesan programa ida oinseluk nune'e maka traballador timoroan sira sei la afetadu", explika hosi fonte diplomátiku.

Ema timoroan atus resin, iha tinan hirak ikus ne'e, partisipa iha programa ida serbisu sazonal ne'ebé oferese serbisu temporáriu iha área sira hortikultura, iha explorasaun sira ba trigu-musan nian, ai-fuan sira no modo-tahan sira.

Programa ne'ebé apoia hosi Sekretaria Estadu ba Polítika Formasaun Profisional no Empregu Timor-Leste nian (SEPFOPE) no administradu hosi Departamentu Empregu Austrália nian partisipa ona hosi traballador kuaze na'in 300 iha tinan liubá.

Tuir fonte diplomátiku ne'ebé ko'alia ho Lusa katak programa ne'e sei la afetadu ho mudansa sira ba programa vistu temporáriu sira ba traballador estranjeiru sira ne'ebé maka fó sai hosi primeiru-ministru australianu, Malcolm Turnbull.

Vistu 457 uluk fó ba traballador estranjeiru sira no ba sira nia família durante tinan haat no buka hatán ba nesesidade hosi traballador sira iha área sira ne'ebé ema australianu sira ladún buka.

Vistu 457 hala'o hosi Governu australianu iha tinan 1996, ne'ebé permiti entrada hosi traballador estranjeiru sira ba okupasaun 650 resin, agora sei troka ho vistu foun rua, ida ba tinan rua - ne'ebé bele renova ba tinan rua tan - no ida seluk ba tinan haat ba profisaun sira ho kualifikasaun ne'ebé aas tebes.

Vistu foun rua ne'e eziji pelumenus tinan rua experiénsia nian no ida seluk ho tinan haat resin no eziji kapasidade di'ak iha lian inglés.

Turnbull hatete ona katak programa sira migrasaun nian tenki fó benefísiu ba interese nasional no garanti liu fatin serbisu sira ba ema australianu sira.

"Ami sei la kontribui tan atu vistu 457 sira sai hanesan pasaporta ba serbisu sira ne'ebé bele no tenki diriji ba ema australianu sira", primeiru-ministru hatete iha mensajen ida ne'ebé fó sai iha nia konta rede sosial Facebook.

Xefe Governu refere ona katak Austrália "hanesan produtu ida imigrasaun nian no nasaun ida multikultural susesu nian", maibé garanti katak "traballador australianu sira tenki iha prioridade iha serbisu sira iha Austrália".

Primeiru-ministru hatete mós katak desizaun ne'e foti hafoin análize detalladu ba situasaun no nega ona katak la'ós hanesan resposta ba partidu sira hosi extrema-direita hanesan One Nation.

"Governu sei rekuza nafatin katak hametin daudaun medida sira imigrasaun nian. Planu hodi halakon vistu 457 iha ligasaun ho One Nation, ita hotu hatene", afirma hosi líder formasaun nian, Pauline Hanson, iha Twitter.

Iha fulan-Setembru 2016 iha Austrália iha ema hamutuk 95.758 maka hanesan rezidente ho vistu ida hanesan ne'e, haktuir hosi informasaun ikus hosi departamentu Imigrasaun australianu nian.

Titular balun hosi vistu ida ne'e mai hosi Índia, tuir Reinu Unidu ho 19,5% hosi total, no hosi Xina ho 5,8%.

Tuir primeiru-ministru, ema sira ne'ebé iha ona vistu sira ne'e sei la afetadu ho medida ne'e.

ho Lusa

 


Comentários

Critério de publicação de comentários