Pájina aktualizada iha 05:59h, kinta-feira 15 Dezembru

ONG portugeza lori bee-moos ba ema rihun resin iha sentru Mosambike

20 de Abril de 2017, 00:07

Aldeia Chipaco, iha sentru Mosambike, agora iha ona bee-moos no hanesan fatin ida ne'ebé maka foin lalais sai hanesan benefísiu hosi projetu sira hosi ONG portugeza Big Hand, fó sai hosi organizmu iha loron-kuarta ne'e.


"Ami iha ona Chipaco tinan rua resin ho programa ida ne'ebé loron-loron apoia labarik fraku sira hamutuk na'in 200 resin ho hahán, hijiene pesoal, apoia eskola nian no dinamizasaun hosi atividade kultural sira no desportu nian", hatete hosi David Fernandes, diretor ONG nian, ba Lusa.

Durante ne'e halibur ona folin ne'ebé presiza hodi loke furu ida hodi hetan bee ne'ebé agora hahú funsiona.

"Populasaun antes uza bee ne'ebé disponível iha rai-kuak sira, lahó kondisaun sira hijiene no seguransa nian", nia hatete.

Laiha informasaun estatístiku ofisial sira, maibé tuir líder komunitáriu katak iha família hamutuk 183 maka hela iha Chipaco (distritu Vanduzi, provínsia Manica).

Tanba família ida-idak karik, iha média, ema na'in lima, kalkula katak entre na'in 900 to'o rihun ida bele hetan benefísiu hosi kaptasaun bee ne'e.

Big Hand agora hakarak harii iha fatin ne'e eskola foun ida hodi evita atu labarik sira tenki la'o kilómetru ualu to'o aldeia ida seluk - distánsia ne'ebé halo sira barak husik eskola.

ONG portugeza harii iha tinan 2010 no, tuir sira nia informasaun rasik, apoia labarik na'in 5.000 iha aldeia oioin iha provínsia Manica.

"Loos duni katak krizi global halo susar hetan fundu sira, maibé ema sira kontinua iha nafatin laran-luak no vontade maka'as hodi hakarak muda mundu no tanba ne'e sei iha kontribuisaun", refere hosi David Fernandes.

Iha kampaña sira ne'ebé halo daudaun hodi hetan ajuda, hanesan ezemplu, "lápis ida ba eskola ida", ne'ebé maka lápis ida vale ba kontribuisaun euro ida, aleinde inisiativu sira seluk ne'ebé maka bele haree iha organizasaun nia pájina iha Internet.

Lusa

 


Comentários

Critério de publicação de comentários