Pájina aktualizada iha 12:59h, tersa-feira 17 Outubru

Prezidente filipinu hakarak fó arma ba sivil hodi kombate extremista sira

20 de Abril de 2017, 20:41

Prezidente Filipina nian, Rodrigo Duterte, hatudu ona intensaun hodi entrega arma sira ba populasaun sira iha Bohol hodi kombate militante extremista sira ne'ebé subar iha illa, hafoin atake ida ne'ebé falla hosi grupu Abu Sayyaf iha semana liubá.


"Ha'u iha intensaun hodi fó arma no envole ema sivil sira", hatete hosi Prezidente iha loron-kuarta kalan, iha entrevista ida ba imprensa lokal, durante vizita iha Bohol, iha rejiaun sentral nasaun nian.

Duterte hatete katak bainhira ema rezidente sira iha zona oho ema sira ne'ebé deskonfia hanesan terorista "lalika preokupa: ba iha polísia, halo relatóriu ida ne'ebé deklara lia-loos no sei laiha problema ruma", hodi promete fó perdaun ba posível homisídiu sira.

Prezidente hatete ona katak sei ko'alia ho autoridade lokal sira kona-ba proposta fó arma ba sivil sira, tanba ne'e "bele hamosu dúvida ruma".

Duterte vizita Bohol liutiha semana ida hafoin membru na'in 13 hosi Abu Sayyaf tama infiltradu iha illa, iha ró peska sira nia laran hodi bele halo sekuestru ba turista sira.

Iha final fulan ne'e nian, Asosiasaun hosi Nasaun sira Sudeste Aziátiku nian (ASEAN) sei hasoru malu iha Bohol.

Populasaun sira haree grupu ne'e iha loron 11 liubá no ezérsitu hasoru ona sira, hodi halo mate soldadu na'in tolu, polísia na'in ida no rebelde na'in neen, inklui Abu Rami ne'ebé konsidera hanesan líder ida hosi Abu Sayyaf.

Extremista na'in neen konsege halai, nune'e maka Duterte oferese ona iha loron-kuarta rekompensa ida ho folin peso millaun ida (euro 18.700) ba sé maka fasilita hodi kaer sira, "mate ka moris".

"Ha'u oferese rekompensa ida kona-ba terorista sira mate ka moris, maibé ha'u hakarak sira mate tanba bainhira sira moris tenki fó han sira no sai karun liu", nia hatete.

Insidente ne'e bele reprezenta golpe todan ida ba ekonomia illa nian, destinu turístiku ida ne'ebé to'o agora la hetan prezensa hosi movimentu extremista sira.

Abu Sayyaf, harii iha tinan 1991 iha illa Basilan, kaer ona iha tinan hirak ikus ne'e ema sanulu resin iha bee sira hosi sudueste Filipina nian no nordeste Malázia nian, hodi husu resgate hodi sira bele moris.

Iha fulan-Fevereiru, grupu oho ona refén alemaun ida tanba sira la simu osan ne'ebé sira husu, no mantén iha sira nia kbiit refén na'in 30, inklui ema estranjeiru na'in 20 resin.

ho Lusa

 


Comentários

Critério de publicação de comentários