Pájina aktualizada iha 12:49h, tersa-feira 17 Outubru

Justisa indonéziu husu liberdade kondisional tinan rua ba governador tanba blasfémia

20 de Abril de 2017, 23:32

Ministériu Públiku indonéziu husu ona iha loron-kinta ne'e liberdade kondisional tinan rua ba governador hotu ona nia funsaun iha Jakarta, ne'ebé hasoru hela julgamentu tanba halo blasfémia iha nasaun musulmanu boot iha mundu.

Basuki Tjahaja Purnama, koñese ho naran "Ahok", hanesan kulpadu tanba halo sala ida iha públiku", deklara hosi prokurador, Ali Mukartono, hodi subliña katak akuzadu ko'alia ho "hostilidade, ódiu ka humillasaun kona-ba parte hosi populasaun indonéziu", iha nia maioria (besik 90%) musulmanu.

Pedidu ne'e aprezenta liutiha loron ida hafoin "Ahok", ho orijen hosi minoria rua kristaun ho xineza, lakon iha eleisaun sira, manán hosi rival musulmanu ne'ebé apoiadu hosi relijiozu konservador sira.

Governador ne'e hetan akuzasaun iha finan tinan liubá tanba hatete aat Islaun. Argumentu ikus sira defeza nian ajenda ona ba fulan ne'e nia rohan no julgamentu sei hahú iha Maiu.

Kastigu máximu ba blasfémia iha Indonézia maka kadeia tinan lima.

"Ahok" hetan ona akuzasaun ne'e tanba divulgasaun hosi vídeo ida, ne'ebé nia hatete ba eleitor sira katak ema lohi sira bainhira sira fiar iha interpretasaun hosi ulaima balun (teólogu musulmanu sira) hosi versíkulu ida espesífiku hosi Alkoraun bandu musulmanu sira hili ema ida ne'ebé la'ós musulmanu hanesan líder.

Grupu konservador islámiku sira organiza ona protestu sira hasoru "Ahok", ne'ebé halibur ema millaun resin iha Jakarta.

"Ahok", governador dahuluk ne'ebé la'ós musulmanu iha tinan 50 ikus ne'e no hanesan ida dahuluk ne'ebé mai hosi minoria xineza, tama automátiku ba kargu iha tinan 2014, hafoin antesesor Joko Widodo nian sai eleitu xefe Estadu.

Iha loron-kuarta, "Ahok" lakon iha eleisaun lokal sira bainhira hetan 42% hosi votu sira hasoru 58% ne'ebé hetan hosi antigu ministru Edukasaun Anies Basdewan, tuir hosi estimativa sira.

Kargu influente governador kapital hosi populasaun millaun sanulu konsidera hanesan trampolim ida ba prezidensial tinan 2019 nian.

ho Lusa

 


Comentários

Critério de publicação de comentários