Pájina aktualizada iha 00:52h, segunda-feira 22 Agostu

Bruxelas garanti katak sei respeita direitu sira Reinu Unidu nian to'o nia saída

21 de Abril de 2017, 00:27

Komisaun Europeia (CE) garanti ona iha loron-kinta katak sei respeita direitu sira Reinu Unidu nian hanesan membru Uniaun Europeia (UE) no sei kopera ho dalan "sinseru" ho nasaun to'o nia sai definitivu hosi Uniaun.


"Ami nia pozisaun maka atu Reinu Unidu kontinua hanesan membru UE nian, ho sira nia direitu no obrigasaun sira, to'o loron nia sai", ka to'o konsumasaun hosi “Brexit”, afirma hosi porta-vós Komisaun nian Mina Andreeva, tuir ajénsia Efe, iha deklasaun sira iha konferénsia imprensa iha Bruxelas.

Andreeva hatán ba kestaun ida kona-ba karik CE hahú hadook empreza británika sira hosi kontratu komunitáriu multimilionáriu sira no ameasa empreza europeia sira iha Reinu Unidu atu desloka ba nasaun ida hosi Estadu-membru 27 seluk, hanesan fó sai iha diáriu britániku Financial Times (FT) iha loron-kinta ne'e.

"CE sei trata nafatin Reinu Unidu ho respeitu total ba prínsipiu koperasaun loloos nian ne'ebé inskritu iha ami nia tratadu sira no sei respeita direitu atu Reinu Unidu bele aproveita hanesan membru", porta-vós hatutan.

Tuir edisaun hosi FT iha loron-kinta, UE hahú hadook ona empreza britániku sira hosi kontratu europeu multimilionáriu sira no akonsella empreza europeia sira ho sede iha Reinu Unidu hodi transfere ba Estadu-membru seluk hosi nasaun 27 nian.

Jornal haktuir memorandu internu ida hosi funsionáriu importante sira CE nian ba sira nia kolaborador sira ne'ebé refere nesesidade hodi evita "komplikasaun adisional sira ne'ebé la nesesáriu" ho Reinu Unidu antes tinan 2019, tinan previstu ba ‘Brexit’.

Textu husu ho dalan explísitu ba funsionáriu europeu sira hodi fó korajen ba empreza sira ne'ebé ho baze iha Reinu Unidu hodi prepara "efeitu legal sira" hosi saída nasaun nian hosi UE no konsidera abertura ba delegasaun sira iha Estadu-membru hosi nasaun 27 ida hodi nune'e bele mantén autorizasaun hosi atividade ekonómiku.

Memorandu, haruka liutiha semana ida hafoin primeira-ministra británika, Theresa May, ativa tiha artigu 50 hosi Tratadu Lisboa, refere katak Reinu Unidu hahú lalais lakon influénsia, maski mantén obrigasaun sira no direitu formal sira hosi Estadu-membru to'o husik.

Sempre tuir dalan legal possível, Komisaun Europeia no nia ajénsia sira tenki "hanoin", iha kontratasaun ema no asinatura kontratu sira, atu Reinu Unidu bele sai hanesan "nasaun datoluk ida" iha tinan rua nia laran, haktuir hosi textu.

Memorandu asina hosi sekretáriu-jeral hosi Komisaun Europeia, Alexander Italianer, hosi xefe gabinete hosi prezidente Komisaun nian, Martin Selmayr, no hosi negosiador UE nian ba ‘Brexit’, Michel Barnier, tuir FT.

ho Lusa

 


Comentários

Critério de publicação de comentários