Pájina aktualizada iha 12:39h, tersa-feira 17 Outubru

Tailándia ameasa blokeia Facebook bainhira la hasai konteúdu hamutuk 13

17 de Maio de 2017, 00:25

Iha loron-tersa ne'e autoridade sira hosi Tailándia ameasa blokeia asesu ba Facebook bainhira rede sosial la halakon konteúdu hamutuk 13 ne'ebé konsidera hanesan ameasa ida ba seguransa nasional ka insultu ida ba família real.


Junta militar aumenta ona sensura iha Internet bainhira kaer kbiit iha golpe Estadu ida iha fulan-Maiu 2014 no, liuhosi Komisaun Nasional Telekomunikasaun nian, fó ona ultimatu ida ba empreza norte-amerikanu ida hodi halakon publikasaun hamutuk 13.

Asosiasaun hosi Servidor sira Internet Tailándia nian alerta ona filial Facebook nian iha nasaun katak sei la konekta rede hosi distribuisaun konteúdu sira nian - hodi lokaliza uzuáriu - bainhira la atende pedidu hosi Governu.

Iha mensajen ida ne'ebé haruka iha loron-sesta, ne'ebé fó sai hosi jornal Bangkok Post, fornesedor sira Internet nian admiti ona katak sira hetan presaun hosi junta, ne'ebé eziji taka rede distribuisaun nian hodi blokeia material tanba konsidera hanesan la legal.

"Asaun ne'e bele afeta serbisu distribuisaun tomak hosi www.facebook.com ba kliente sira iha Tailándia", hatete hosi operador sira iha karta ida.

Autoridade sira ameasa ona Facebook ho asaun legal sira bainhira empreza la hasai konteúdu sira iha loron-tersa ne'e.

Asembleia Nasional ba Reforma, ne'ebé nia membru sira hili hosi junta, husu ona iha loron-segunda hodi harii lalais komisaun ida ne'ebé permiti ba militar sira hodi asede ba komputador ruma iha nasaun lahó orden judisial nian.

Xefe hosi junta militar no primeiru-ministru Prayuth Chan-ocha, hatete ona dalabarak katak konkorda ho kriasaun hosi asesu úniku ida ba Internet iha Tailándia, hodi aumenta kontrolu ba konteúdu sira.

Tuir autoridade sira, pájina no publikasaun sira hamutuk 6.900 iha Internet hetan ona blokeiu iha nasaun ne'e hahú hosi tinan 2015.

Iha fulan-Abril, autoridade sira bandu ona kontaktu liuhosi Internet ho ema opozisaun na'in tolu no alerta ona ba konsekuénsia penal sira ba sé maka halo interasaun ho ema na'in tolu ne'e, komentador aplika kona-ba asuntu sira hosi família real no krítiku sira hosi junta militar.

Ema opozisaun na'in tolu ne'e hanesan istoriador Somsak Jeamteerasakul, ne'ebé husu ezíliu iha Fransa hafoin golpe Estadu tinan 2014, eis-diplomata no akadémiku Pavin Chachavalpongpun, eziladu iha Japaun, no jornalista no eskritor Andrew MacGregor Marshall.

Tailándia iha lei apertadu ida hasoru krimi sibernétiku sira ne'ebé maka organizasaun sira ne'ebé defende direitu ema nian hatete katak uza hodi bandu liberdade expresaun nian.

Iha nasaun ne'e hala'o mós lei kona-ba atentadu hasoru autoridade ka soberanu ida, lei ida ne'ebé todan liu iha mundu, ne'ebé kondena to'o tinan 15 iha kadeia ba ema sira ne'ebé fó sai mensajen sira kona-ba Uma Real ne'ebé autoridade sira konsidera hanesan ofensivu.

Hamutuk ema na'in 105 maka kaer ona tanba krimi halo atentadu hasoru autoridade dezde militar sira kaer poder, na'in 49 hetan ona kondenasaun to'o tinan 30 iha kadeia no na'in 64 iha hela prizaun preventicu, hein julgamentu, haktuir hosi grupu ativista sira.

Antes golpe Estadu tinan 2014, kaer de'it ema na'in neen tanba krimi hasoru autoridade sira iha Tailándia.

ho Lusa

 


Comentários

Critério de publicação de comentários