Pájina aktualizada iha 10:21h, tersa-feira 23 Maiu

Prezidente timoroan husu ba sidadaun sira atu luta ba sosiedade ida ne'ebé justu liu

17 de Maio de 2017, 22:34

Iha loron-kuarta ne'e Prezidente timoroan konsidera ona katak futuru asu-wa'in Timor-Leste maka ema sira ne'ebé konsege luta loron-loron ba mehi hanesan hodi harii sosiedade ida ne'ebé dezenvolvidu no justu liu, inspira iha sakrifísiu sira ne'ebé halo ona iha pasadu.


"Ohin loron ita iha mehi seluk, mehi ba sosiedade ida ne'ebé dezenvolvidu liu no justu liu. Ita presiza empeñu hanesan, hosi sakrifísiu hanesan no solidariedade hanesan", Taur Matan Ruak hatete hafoin kondekora sidadaun timoroan sira no estranjeiru sira na'in sanulu resin.

"Asu-wa'in foun sira hosi libertasaun nasional nian maka sira ne'ebé halo tuir banati hosi sakrifísiu sira iha pasadu no interpreta loron-loron iha nia moris pesoal, polítika no sosial. Ita labele husik atu luta ba mehi hanesan Timor-Leste nian", nia hatete.

Iha loron balun antes hakotu mandatu, iha loron-sábadu, Taur Matan Ruak kondekora ona ho kolar, medalla no insígnia hosi Orden Timor-Leste nian ba sidadaun nasional sira no estranjeiru sira, inklui jornalista portugeza Anabela Góis hosi Rádiu Renascença.

Ho Medalla Mérito fó ba Carlos Monjardino, prezidente hosi Fundasaun Oriente, ne'ebé Taur Matan Ruak destaka hanesan "apoiante kleur tebes ba kauza Timor-Leste nian", hodi subliña asaun hosi fundasaun ne'e nia iha nasaun laran.

Liga dos Amigos de Timor, ho sede iha Portugal, neozelandeza Maria Leadbeater no ema inglés sira Peter Gordon ho Steve Cox hetan mós rekoñesimentu.

Entre ema timoroan sira, rekoñese mós ema sanulu resin ne'ebé destaka ona iha períudu kombate hasoru okupasaun indonéziu, estafeta sira ne'ebé apoia luta armada no mós ativista sira ne'ebé apoia ona luta iha estranjeiru.

"Estafeta desizivu sira hodi mantén nakloke komunikasaun entre frente oioin hosi luta klandestinu no entre komandante sira hosi frente armada. Ema simples, maibé kriativu, humilde, kiak iha rekursu sira, maibé riku tebes iha imajinasaun duké invasor sira. Nune'e maka mantén nafatin hanoin rezisténsia nian ho ema sira determinadu ne'ebé maka la lakon ho ema ida", nia konsidera.

"Hanesan povu unidu ida, ne'ebé la kolen, ideia koletivu ida, esforsu hosi ema tomak, forsa ida ne'ebé metin. Falta rekupera espirítu ne'e ohin loron ba dezafiu foun sira dezenvolvimentu nian, hadi'a kualidade moris hosi ema tomak nian", nia hatete.

Ba Taur Matan Ruak, ne'e hanesan oportunidade ida hodi rekoñese "sé maka fó maka'as ba luta libertasaun" Timor-Leste nain no hodi hanoin "asaun barak jenerozidade nian, korajen no altruízmu" hosi ema sira ne'ebé "ho dalan oioin sai mós hanesan asu-wa'in kombatente sira ba luta libertasaun nasional nian".

"Ema timoroan sira hakarak nafatin sai de'it hanesan na'in ba sira nia destinu. Ohin loron ita distingi ema sé maka fahe esperansa ne'e iha mundu ida di'ak maski kontra evidénsia sira ne'ebé poténsia sira seluk aprezenta hanesan imposível atu evita", nia hatete.

Ema sira ho "istória ne'ebé la hanesan", maibé iha vontade ne'ebé hanesan, hodi luta ba independénsia nasaun nian.

ho Lusa

 


Comentários

Critério de publicação de comentários