Pájina aktualizada iha 03:08h, kinta-feira 20 Outubru

PM timoroan promete katak Governu sei fó atensaun ba proposta edukativu sira

18 de Maio de 2017, 00:07

Iha loron-kuarta ne'e, primeiru-ministru timoroan afirma ona katak Governu sei fó atensaun ba proposta sira hosi Kongresu Nasional Edukasaun nian ba dala tolu, hodi fó koñese rekomendasaun sira iha nível nasional no ba ezekutivu foun.


"Governu, liuhosi Ministériu Edukasaun, sei halo buat hotu hodi divulga iha nível nasional Deklarasaun Ikus hosi Kongresu Nasional Edukasaun nian ba dala tolu to'o hakotu nia mandatu, kompromete mós hodi informa ho dia'k ba Ezekutivu foun kona-ba importánsia hosi rekomendasaun sira ne'e", hatete hosi Rui Maria de Araújo.

"Kongresu ne'e kumpri ona nia objetivu, no liuhosi diskusaun saudável ida hosi nia debate temátiku sira relasionadu ho hanoin interese nasional nian, halo ona proposta terapéutika ida", nia hatete iha momentu ikus hosi enkontru loron tolu ne'ebé hotu ona iha Díli.

Rui Araújo fó hanoin katak rekomendasaun sira aprovadu mosu hosi proseu diagnóstiku ida detalladu ne'ebé halo hosi funsionáriu públiku sira edukasaun nian no, antes, hosi debate loron tolu iha kongresu edukativu.

"Ami rejista ona rekomendasaun sira kona-ba uzu hosi lian ofisial sira hanesan dalan komunikasaun nian, edukasaun no transmisaun hosi koñesimentu sira, no hodi harii Konsellu Nasional Edukasaun ida ne'ebé iha afetu ba Komisaun Sientífiku Espesializadu", nia hatete.

"Kona-ba dezafiu ne'ebé relasionadu ho formasaun hosi profesor sira nian, imi nia rekomendasaun sei iha sentida hodi analiza posibilidade hodi aumenta CAFE, aliña formasaun dahuluk hosi profesor sira ho Kuríkulu Nasional, estabelese polítika ida jestaun formasaun kontínua nian no halo diagnóstiku nasional ne'ebé bele hetan lukru nesesidade sira formasaun dahuluk no kontínua hosi profesor sira", nia hatutan.

Entre proposta sira iha rekomendasaun sira iha área sira hosi Kuríkulu Nasional Ensinu nian, jestaun no formasaun ba profesor sira, administrasaun no inspesaun eskolar, infraestrutura sira, ekipamentu sira no rekursu edukativu sira, jestaun hosi Ensinu Superior públiku no privadu no partisipasaun hosi aman-inan sira, hosi komunidade, hosi área privadu no parseiru sira seluk.

Primeiru-ministru timoroan hatete katak edukasaun hanesan "prioridade nasional ida no hanesan interese komun" no senti konviktu katak rekomendasaun sira sei kontribui ba faze implementasaun daruak hosi Planu Estratéjiku Dezenvolvimentu nian no sei ajuda Timor-Leste hodi kumpri Objetivu sira Dezenvolvimentu Sustentável nian.

"Baze ida Nasaun inan, hanesan ida ne'e hosi Edukasaun, sei la metin hosi loron ida ba loron seluk", nia afirma.

Rui Araújo aproveita intervensaun hodi agradese apoiu hosi parseiru internasional sira ba área edukativu.

Primeiru-ministru destaka ona liuliu nasaun sira hosi Komunidade Nasaun sira Lian Portugeza (CPLP) nian, liuliu Portugal ho Brazil, "ba apoiu maka'as", no mós Kuba, Koreia-Súl, Austrália ho Nova Zelándia, Estadus Unidus, no Japaun, aleinde instituisaun internasional sira seluk.

"Di'ak tebes haree uma nakonu iha kongresu ida ne'ebé la'ós partidáriu. Ne'e signifika de'it katak ita hotu hanesan partidáriu polítiku sira ba kualidade ensinu nian iha Timor-Leste. No tanba iha eis-titular sira hosi Ministériu Edukasaun nian hosi Governu oioin, hosi kuadrante oioin, hanesan sasin katak edukasaun hanesan suprapartidáriu", nia konsidera.

ho Lusa

 


Comentários

Critério de publicação de comentários