Pájina aktualizada iha 05:57h, kinta-feira 15 Dezembru

Basílio do Nascimento: Timor-Leste lakon "figura importante"

19 de Maio de 2017, 19:20

Prezidente hosi Konferénsia Episkopal Timoroan nian no bispu Baucau nian, Basílio do Nascimento, lamenta ona iha loron-sexta ne'e ba Mário Carrascalão nia mate, konsidera nia hanesan "figura importante" ida ne'ebé tau Timor-Leste "iha asuntu internasional".


"Hanesan lakon ida hosi figura boot ida, gosta ka la gosta, konkorda ka la'e, hanesan ona figura boot ida Timor nian, durante tempu okupasaun nian", afirma hosi Basílio do Nascimento ba Lusa.

Mário Carrascalão "tau ona Timor iha asuntu internasional, liuliu iha momentu ne'ebé Timor ladún koñesidu iha estranjeiru. Nia uza ona nia matenek, nia kapasidade konviksaun nian, hodi loke Timor ba mundu no halo atu mundu hatene saida maka akontese iha Timor", nia konsidera.

Preladu timoroan destaka ona knaar importante Mário Carrascalão nian iha edukasaun hosi ema timoroan barak, inklui hosi líder atual sira nasaun nian no importánsia hosi enkontru sira ne'ebé nia mantén ho Prezidente dahuluk Timor-Leste nian, Xanana Gusmão, iha tinan 1993, besik iha Lariguto.

"Hanesan enkontru istóriku ida no hakbesik timoroan sira ne'ebé iha tempu ne'ebá haketak malu tanba ideolojia sira no tanba kondisaun sira. Asaun istóriku ida hosi sira na'in rua, Xanana Gusmão ho Mário Carrascalão", nia hatete.

Importánsia hosi Lariguto koñesidu simbóliku iha salaun prinsipal hosi edifísiu Komisaun Nasional Eleisaun nian (CNE), ne'ebé fó naran ba fatin ne'e, hodi rekoñese diálogu ne'ebé reprezenta.

"Mário Carrascalão hanesan figura importante ida. Ohin loron ladún iha lian sira ne'ebé hanesan krítika hosi nia asaun no maski ema oituan ne'ebé halo krítika ba nia fó nafatin rekoñesimentu ba nia méritu", hatete hosi bispu timoroan.

Hatán kona-ba Mário Carrascalão karik tenki hakohi iha rate Herói sira nian iha Metinaro, Basílio do Nascimento hatete katak desizaun ne'e depende ba família, maibé eis-visi-primeiru-ministru "merese lahó dúvida hakohi iha fatin ne'e".

Mário Viegas Carrascalão mate iha loron-sesta ne'e iha Díli, ho tinan 80, buat hotu hatudu katak hanesan vítima hosi atake fuan nian ne'ebé nia hetan bainhira lori karreta rasik iha sentru Díli nian.

ho Lusa


Comentários

Critério de publicação de comentários