Pájina aktualizada iha 14:17h, sabado 19 Agostu

Taur Matan Ruak despede hosi Prezidénsia hodi agradese ba apoiu internasional

19 de Maio de 2017, 23:33

Iha loron-sesta ne'e Taur Matan Ruak despede ona hosi Prezidénsia Repúblika hodi agradese ba parseiru internasional sira Timor-Leste nian ba apoiu ne'ebé fó nafatin ba nasaun, ne'ebé hanesan importante, hamutuk ho estabilidade no dame, ba dezenvolvimentu nasional.


"Ha'u aproveita okaziaun ne'e hodi hatudu rekoñesimentu ba públiku ba apoiu ne'ebé ita simu nafatin hosi ita nai parseiru sira dezenvolvimentu nian", hatutan hosi Prezidente iha Palásiu Prezidensial Nicolau Lobato, iha jantar despedida hosi nia mandatu no ba iha individualidade nasional sira no reprezentante internasional sira, ne'ebé hanesan konvidadu ba tomada pose hosi nia susesor, Francisco Guterres Lu-Olo.

"Opsaun determinadu hosi povu timoroan nian ba estabilidade no dame no asisténsia ne'ebé ita iha hosi ONU no hosi nasaun belun sira permiti ona ita avansa ba hakat foun ida hosi kontrusaun nasional nian", nia afirma.

Xefe Estadu destaka liuliu ba viziñu sira Indonézia ho Austrália, "nasaun maun-alin sira CPLP nian" no nasaun sira seluk ne'ebé maka Timor-Leste matén "relasaun amizade sira no koperasaun maka'as", hanesan Xina, Japaun, Repúblika Koreia, Nova Zelándia, Estadus Unidus ho Kuba.

"Ha'u agradese ba povu sira no governu sira hosi nasaun sira ne'e ba asisténsia ne'ebé fó nafatin mai ami hodi hametin dame no ba konstrusaun nasional iha Timor-Leste, hahú hosi Restaurasaun Independénsia", nia hatete.

Xefe Estadu, ne'ebé hakotu nia mandatu iha kalan boot loron-sesta ne'e, oras lokal, hakarak destaka "importánsia katak koperasaun multilateral hosi Uniaun Europeia no bilateral hosi parseiru europeiu sira iha implementasaun hosi planu nasional sira dezenvolvimentu ekonómiku nian no hosi konsolidasaun institusional".

"Ha'u hakarak hatudu mós ha'u nia rekoñesimentu ba parseiru dezenvolvimentu sira seluk ne'ebé kontribui ona ka kontribui hela ba realizasaun hosi ami nia projetu sira, liuhosi ONU no ajénsia internasional sira seluk", nia afirma.

Xefe Estadu hatete katak apoiu bilateral no multilateral "no determinasaun ba dame hosi ema timoroan sira kontribui nafatin ba ambiente ida estabilidade nian no expektativu pozitivu", maski nasaun hasoru dezafiu importante sira.

Lahó antevizaun ba nia knaar foun - karik sei sai nu'udar prezidente hosi Partidu Libertasaun Popular nian ne'ebé sei aprezenta iha eleisaun parlamentar sira loron 22 Jullu -, Taur Matan Ruak hatete katak "despedida ida la'ós hanesan final ida".

Husik mós votu sira "susesu nian" ba nia susesor ne'ebé sei simu pose iha tuku 00:00, Francisco Guterres Lú-Olo.

ho Lusa

 


Comentários

Critério de publicação de comentários