Pájina aktualizada iha 14:01h, sabado 16 Dezembru

Francisco Guterres Lu-Olo simu pose nu'udar Prezidente dahaat dezde restaurasaun

20 de Maio de 2017, 00:50

Francisco Guterres Lu-Olo simu pose iha ohin nu'udar prezidente dahaat dezde restaurasaun independénsia Timor-Leste iha sesaun solene ida hosi Parlamentu Nasional nian ne'ebé halo iha resintu ida iha Tasi Tolu iha besik Díli.


"Ha'u jura, ba Maromak, ba povu no ho ha'u nia onra, kumpri ho lealdade funsaun sira ne'ebé maka fiar ba ha'u, kumpri no halo kumpri Konstituisaun no lei sira no dedika ha'u nia enerjia tomak no kapasidade sira hodi defende no hametin independénsia no unidade nasional. Iha loron 20 fulan-Maiu, Prezidente Repúblika Francisco Guterres Lu-Olo", hatete, iha minutu balun antes tuku 00:00 oras lokal iha loron 20 fulan-Maiu.

Lu-Olo, ne'ebé manán ona eleisaun prezidensial sira loron 20 Marsu nian, troka ona Taur Matan Ruak ne'ebé kompleta ona mandatu tinan lima no hanesan prezidente daneen Timor-Leste nian, tanba konta ho Francisco Xavier do Amaral, ne'ebé proklama ona independénsia 28 Novembru 1975, no nia susesor Nicolau Lobato.

Hafoin ne'e, ho plateia tomak hamrii, bele rona hinu timoroan, “Pátria, Pátria”.

Adérito da Costa, prezidente Parlamentu Nasional loke sesaun solene iha tuku 23:40 oras lokal, deputada Fernanda Lay, sekretária meza nian, maka le akórdaun hosi Tribunal Rekursu ne'ebé konfirma ona vitória eleitoral.

"Iha konformidade ho rezultadu provizóriu sira hosi apuramentu kandidatu Francisco Guterres Lu-Olo hetan ona 57,1% hosi votu válidu nune'e (...) hanesan eleitu ba Prezidente Repúblika", hakerek iha textu.

"Tribunal ne'e desidi halo validasaun votasaun ne'e ba Prezidente Repúblika ne'ebé halo iha loron 20 Marsu, no rezultadu definitivu sira", refere hosi rezolusaun ne'ebé asina iha loron 30 Marsu.

Preparasaun ba serimónia sira loron-sábadu (oras lokal) envolve ona ema sanulu resin ne'ebé kria senáriu ida ne'ebé domina ho kór haat hosi bandeira timoroan nian, mean, amarelu, metan no mutin.

Iha sentru iha ai-riin boot mutin ida no iha planu dahuluk, iha ai-riin nia kotuk, iha estrutura kuadradu ki'ik ida ho kadeira rezervadu ba Prezidente Francisco Guterres Lu-Olo.

Iha kotu iha estrutura daruak ida ne'ebé instala meza hosi prezidénsia Parlamentu Nasional nian, lidera hosi Adérito Hugo da Costa, ne'ebé loke ona sesaun solene plenáriu nian, transfere ba Tasi Tolu ba serimónia ne'e.

Iha nia sorin-karuk iha antigu Prezidente Repúblika no iha nia sorin-loos iha Prezidente eleitu, Lu-Olo.

Fila fali ba estrutura rua iha tribunal boot lima, ho kapasidade total ba ema na'in 2.000 resin no ne'ebé maka iha deputadu sira, konvidadu sira onras nian no reprezentante internasional sira.

Fatin rezervadu sira seluk tau, rua iha fatin prinsipal ida-idak, ida okupa hosi Governu no ida seluk hosi konvidadu espesial sira.

Afastadu hosi zona sentral iha zona rezervadu sira ba públiku, ne'ebé antes serimónia solene bele akompaña konsertu muzikal ida iha oras barak nia laran ne'ebé sei kontinua durante madrugada.

Serimónia sira transmiti ona iha direitu hosi televizaun nasional RTTL no hosi kanal foun GMN TV, ne'ebé sei lansa iha semana oinmai no ne'ebé maka sei sai hanesan kanal jeneralista privadu dahuluk timoroan nian.

Ne'e hanesan ba dala tolu maka xefe Estadu timoroan ida simu pose iha fatin no oras hanesan, hafoin Xanana Gusmão (ne'ebé simu pose iha tinan 15 liubá) no Taur Matan Ruak (ne'ebé simu pose iha loron hanesan iha tinan 2012).

José Ramos-Horta simu pose iha tinan 2007, iha loron hanesan, maibé halo iha loron 20 dadeer iha Parlamentu Nasional.

Efetivu na'in 200 resin hosi PNTL no F-FDTL partisipa ona iha parada ne'ebé akompaña serimónia solene sira loron-sábadu nian, ne'ebé monta ona dispozitivu boot ida seguransa nian, ne'ebé inklui eskolta no akompañamentu ba delegasaun internasional sira.

ho Lusa

 


Comentários

Critério de publicação de comentários