Pájina aktualizada iha 12:39h, tersa-feira 17 Outubru

Prezidente Lu-Olo dedika liafuan dahuluk sira hodi hanoin Mário Carrascalão

20 de Maio de 2017, 01:02

Prezidente timoroan, Francisco Guterres Lu-Olo, dedika ona liafuan dahuluk sira hosi nia diskursu tomada pose nian hodi halo homenajen ba eis-visi-primeiru-ministru Mário Carrascalão, ne'ebé mate iha loron-sesta ne'e ho tinan 80 iha Díli.


"Ha'u hakarak halo homenajen ba eis-membru hosi Asembleia Konstituinte no eis-visi-primeiru-ministru Mário Viegas Carrascalão, ne'ebé husik ona ita. Hein katak nia klamar deskansa ho di'ak no atu família bele hetan forsa no konfortu iha moementu susar tebes ba ema hotu", nia hatete.

"Ha'u nia kondolénsia maka'as ba família. Hodi ha'u nia naran rasik ho hodi família tomak nia naran", nia hatete no hafoin ne'e husu ba ema tomak hodi hamriik.

Mário Viegas Carrascalão mate iha loron-sesta ne'e iha Díli, ho tinan 80, buat hotu hatudu katak hanesan vítima hosi atake fuan nian ne'ebé nia hetan bainhira lori karreta rasik iha sentru Díli nian.

Dirijente istóriku timoroan, ne'ebé uluk sai ona governador ne'ebé nomeadu hosi indonézia no visi-primeiru-ministru iha Governu konstitusional dahaat, lidera hosi Xanana Gusmão, kondekoradu iha loron-kinta ne'e ho Grande Colar da Ordem Timor-Leste nian hosi xefe Estadu Taur Matan Ruak, ne'ebé hakotu ohin nia mandatu.

ho Lusa

 


Comentários

Critério de publicação de comentários