Pájina aktualizada iha 03:06h, kinta-feira 20 Outubru

Ramos-Horta destaka "integridade, honestidade, dedikasaun"

20 de Maio de 2017, 01:34

Eis-Prezidente timoroan José Ramos-Horta fó hanoin iha loron-sesta ne'e "integridade, honestidade no dedikasaun ba Timor-Leste" hosi eis-visi-primeiru-ministru Mário Carrascalão, ne'ebé nia notísia mate Ramos-Horta simu ho "hakfodak tebes".


"Dalabarak labele komprende. Maibé laiha ema ida iha Timor-Leste ne'ebé maka dalaruma bele aponta buat negativu ba Mário Carrascalão kona-ba nia integridade, honestidade no nia dedikasaun ba Timor-Leste", Ramos-Horta hatete ba Lusa iha Díli.

"Mário Carrascalão hanesan nafatin defensor ida ba lia-loos, fó sai korupsaun ka prepoténsia iha tempu indonéziu nian no hafoin independénsia, maibé defende nafatin ba reuniaun, rekonsiliasaun entre timoroan tomak", nia afirma.

Ramos-Horta hatete katak nia admira nafatin Carrascalão, oan dalima hosi maun-alin na'in 12 (no hanesan ida dahaat maka mate), "hahú hosi tempu sira ne'ebé nia hanesan xefe hosi serbisu sira agrikultura nian", no iha tempu administrasaun portugeza nian iha Timor-Leste.

Hafoin ne'e, nia koñese mane "simples, asesível no honestu", ne'ebé kaer ona knaar sira iha misaun permanente hosi Indonézia nian iha ONU, no "maski hosi kampu diplomátiku sira ne'ebé la hanesan" nia "hatete ho segredu nafatin situasaun loloos iha nasaun", nia afirma.

"Bainhira hetan konviti hodi sai nu'udar Governador, nia husu ha'u nia opiniaun no ha'u hatete katak tenki aseita nune'e bele proteje ema timoroan sira no nia aseita", Ramos-Horta hanoin hikas.

"Nia salva ona ema timoroan barak nia moris, konsege loke ba dala uluk Timor-Leste no ba dala uluk maka timoroan atus resin bele ba Jakarta hodi estuda ho bolsa estudu sira", nia hatete.

"Iha situasaun oioin ne'ebé maka nia halo intervensaun ba iha Suharto [Prezidente Indonézia nian entre tinan 1967 no 1998) hodi hadi'a situasaun iha Timor-Leste", nia hatete hodi hanoin hikas serbisu hosi ema ida ne'ebé uluk sai ona nu'udar Governador Timor-Leste nian entre tinan 1982 no 1992.

Mário Viegas Carrascalão mate iha loron-sesta ne'e iha Díli, ho tinan 80, buat hotu hatudu katak hanesan vítima hosi atake fuan nian ne'ebé nia hetan bainhira lori karreta rasik iha sentru Díli nian.

Sasin ida, Hipólito da Silva, hatete katak haree karreta sai hosi estrada hafoin xoke hasoru poste ida, no halai ba tulun Carrascalão ne'ebé maka iha momentu ne'ebá sei dada iis. Mate iha tempu balun hafoin lori ba Hospital Guido Valadares.

Família organiza hela funeral.

Fundador hosi partidu dahuluk timoroan nian, União Democrática Timorense (UDT), Carrascalão sai ona nu'udar Governador ne'ebé nomeadu hosi Jakarta no, hafoin independénsia, kaer kargu nu'udar visi-primeiru-ministru hosi Governu konstitusional dahaat.

ho Lusa

 


Comentários

Critério de publicação de comentários