Pájina aktualizada iha 09:14h, kuarta-feira 20 Setembru

UNICEF & OMS: Angola ladún iha asesu ba bee moos entre nasaun luzófonu sira

13 de Julho de 2017, 18:30

Angola hanesan, hosi Estadu luzófonu sira, nasaun ne'ebé ladún iha asesu ba bee moos "per kapita", ne'ebé iha de'it 44% hosi populasaun maka fásil hetan bee moos, ho Portugal (100%) ho Brazil (97%) iha fatin la hanesan, indika hosi ONU iha loron-kuarta.


Iha relatóriu hosi Programa Konjuntu hosi Monitorizasaun ONU nian, ne'ebé elabora hosi Fundu ONU nian ba Infánsia (UNICEF) no hosi Organizasaun Mundial Saúde nian (OMS), analiza ona situasaun sira, to'o tinan 2016, hosi bee moos, saneamentu no hijiene iha nasaun no teritóriu hamutuk 200 resin.

Dokumentu halo komparasaun entre evolusaun ne'ebé rejista iha nasaun ida-idak hosi nasaun sia luzófonu nian - Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe no Timor-Leste - entre tinan 2000 no 2015, nune'e mós haree ba aumentu hosi populasaun nian.

Iha kuadru hosi períudu ne'e, refere mós aumentu hosi populasaun iha zona urbana sira, asesu ba bee ne'ebé ho distánsia minutu 30 resin hosi fatin rezidénsia nian, bee ne'ebé ladi'ak no bee ne'ebé mai hosi superfísie, hanesan mota no bee-lihun sira, entre fonte sira seluk.

Iha asesu ba bee moos kanalizadu, Cabo Verde mosu iha pozisaun datoluk entre nasaun luzófonu sira (sa'e hosi 78% iha tinan 2000 ba 86% iha tinan 2015), halakon São Tomé & Prínsipe (hosi 67% ba 80% iha períudu hanesan), Timor-Leste (laiha informasaun disponível iha tinan 2000, maibé iha tinan 2015 iha 70%), Guiné-Bissau (hosi 53% ba 69%) no Mosambike (hosi 22% ba 47%).

Iha períudu hanesan, Angola aumenta hosi 38% ba 41%, bainhira Brazil aumenta hosi 94% ba 97% no Portugal hosi 99% ba 100%.

Relatóriu subliña katak informasaun sira hanesan sensível ba "relatividade" ruma, tanba hanoin ba tamañu hosi nasaun sira nian, total populasaun nian no nível dezenvolvimentu hosi nasaun ida-idak.

La inklui Portugal (ho 0% iha tinan 2000) no Brazil (ne'ebé hamenus hosi 1% iha tinan 2000 ba 0% iha tinan 2015), nasaun luzófonu sira seluk, iha eskala boot ka ki'ik, sei iha bolsa sira hosi populasaun ne'ebé bele hetan de'it bee liu minutu 30 resin hosi fatin rezidénsia nian.

Angola, ho 16% hosi populasaun iha sirkunstánsia ne'e durante períudu hanesan, no Guiné Ekuatorial, ne'ebé kontinua mós ho 2%, hanesan Estadu luzófonu rua ne'ebé mantén númeru estatístika sira entre tinan 2000 no 2015.

Informasaun estatístika ne'ebé la hanesan, maibé aat liu, maka, iha períudu hanesan, rejista iha São Tomé & Prínsipe (hosi 13% ba 15% hosi populasaun), Mosambike (aumenta hosi 5% ba 14% hosi populasaun) no iha Guiné-Bissau (hosi 4% ba 5%).

Cabo Verde tuun, iha tinan 15 nia laran, hosi 11% ba 10% hosi populasaun iha sirkunstánsia sira ne'e, bainhira Timor-Leste, ne'ebé iha tinan 2000 laiha informasaun ida iha 6% hosi total populasaun sira ho nesesidade buka bee durante minutu 30 resin hosi sira nia fatin rezidénsia.

Estudu hatudu mós relasaun entre informasaun estatístika no evolusaun hosi populasaun urbanu iha períudu hanesan (hosi 2000 no 2015) iha Estadu luzófonu sira, aumenta nafatin, ho Brazil "lidera" tabela ne'e, ho habitante iha sidade aumenta, iha tinan 15 nia laran, hosi 81% ba 86%.

Cabo Verde hanesan nasaun luzófonu daruak ho kresimentu populasaun urbanu boot (aumenta ona, iha períudu hanesan, hosi 53% ba 66%), tuir São Tomé & Prínsipe (hosi 53% ba 65%), Portugal (hosi 56% ba 63%), Guiné-Bissau (hosi 37% ba 49%), Angola (hosi 32% ba 44%), Guiné Ekuatorial (hosi 39% ba 40%), Timor-Leste (hosi 24% ba 33%) no Mosambike (hosi 29% ba 32%).

ho Lusa

 


Comentários

Critério de publicação de comentários