Pájina aktualizada iha 19:43h, segunda-feira 24 Jullu

Índia maka nasaun ida ho utilizador barak liu iha Facebook

14 de Julho de 2017, 00:21

Informasaun sira fó sai foin lalais ne'e hosi Facebook ba publisitáriu sira hatudu katak Índia halakon EUA no sai ona hanesan nasaun ne'ebé iha utilizador barak liu ne'ebé ativu iha rede sosial. Iha total, besik 11% hosi utilizador sira hanesan ema indianu.


Iha loron-kinta ne'e, relatóriu ne'ebé fó sai rasik hosi Facebook hatudu katak Índia iha "audiénsia potensial" ida hosi utilizador ativu hamutuk millaun 240.

Informasaun sira ne'e hatudu katak númeru hosi utilizador ativu sira aumenta lalais tebes duké iha EUA, ne'ebé antes iha pozisaun dahuluk iha ranking.

Agora daudaun Índia iha populasaun hamutuk millaun 462 ho asesu ba Internet no millaun 241 hanesan utilizador ativu sira hosi rede sosial boot liu iha mundu ne'ebé, foin lalais ne'e, to'o ona utilizador hamutuk biliaun rua iha nível mundial. Facebook iha penetrasaun ida ho 36% iha utilizador sira ho asesu ba internet maibé, iha fulan neen ikus ne'e, númeru hosi membru ativu sira iha Índia aumenta ba besik 27%.

Maski hosi númeru sira halo hakfodak, iha de'it 19% hosi populasaun sira iha Índia maka uza Facebook iha fulan ikus ne'e, númeru ida ne'ebé la hanesan ho ne'ebé rejista iha EUA, ne'ebé nia penetrasaun maka 88% iha ema hamutuk millaun 287 ho asesu ba Internet.

Kona-ba diferensa jéneru nian, Índia ladún hatudu pontu relasionadu ho númeru feto ka mane sira ne'ebé uza Facebook. Hosi millaun 241 ne'ebé uza, 24% maka feto no 76% maka mane.

Fonte: SAPO Tek

 


Comentários

Critério de publicação de comentários