Pájina aktualizada iha 19:43h, segunda-feira 24 Jullu

Trump haruka kondolénsia tanba Nobel Dame nia mate

14 de Julho de 2017, 22:37

Iha loron-kinta ne'e, White House haruka ona komunikadu barak ne'ebé transmiti ona Donald Trump nia tristeza tanba ativista Liu Xiaobo nia mate.


"Sentida kondolénsia sira hosi Prezidente haruka ona ba Liu Xiaobo nia feen, Liu Xia, no ba nia família ho belun sira", afirma ona hosi porta-vós White House nian, Sean Spicer.

Estadus Unidus apela ona ba Governu xinés hodi husik Prémiu Nobel Dame nian no ativista ba demokrasia hodi simu asisténsia médiku iha fatin ne'ebé nia hili. Maibé Xina konsidera katak pedidu ne'e hanesan interferénsia iha nia asuntu sira no entende katak Liu hanesan kriminozu ida.

Komunikadu hosi White House la halo krítika ruma ba Xina ka ba Liu nia kazu.

Liu Xia kontinau iha prizaun domisiliáriu.

Antes Trump, Liu Xiaobo, ho tinan 61, nia mate, asinala hosi xefe diplomasia norte-amerikanu, ne'ebé hanoin hikas nia nu'udar ema ne'ebé dedika ona moris hodi buka justisa no liberdade, maibé mós hanesan ideal humanidade nian.

"Liu Xiaobo dedika ona nia moris hodi hadi'a nia nasaun no humanidade, no buka justisa no liberdade", refere hosi sekretáriu Estadu norte-amerikanu nian, Rex Tillerson, iha komunikadu ida ne'ebé fó sai oras balun hafoin anúnsiu kona-ba opozitor xinés no Nobel Dame ne'e nia mate.

Liu Xiaobo, xinés dahuluk ne'ebé maka hetan Nobel Dame, mate iha ospital ida iha Shenyang, nordeste Xina nian, vítima hosi kankru aten nian.

Opozitor, ne'ebé kumpri hela kastigu ida tinan ualu resin ona hosi tinan 11 nian tanba "revolta", hetan libertasaun kondisional iha fulan-Maiu nia rohan hosi kadeira, loron balun hafoin diagnostikadu ho kankru iha faze ikus, no transfere ba ospital.

Iha komunikadu hanesan, sekretáriu Estadu hosi Estadus Unidus nian dezafia ba autoridade xineza sira hodi liberta opozitor nia feen, Liu xia, ne'ebé hetan prizaun domisiliáriu tempu balun hafoin Liu Xiaobo hetan tiha Nobel Dame nian iha tinan 2010.

"Ha'u dezafia governu xinés hodi liberta Liu Xia hosi prizaun domisiliáriu no permiti nia bele sai hosi Xina, tuir nia hakarak", refere hosi reprezentante Estadus Unidus nian.

Kona-ba "mate trájiku" hosi Liu Xiaobo nian, sekretáriu Estadu norte-amerikanu nian hatete katak, bainhira luta ba liberdade, igualdade no direitu konstitusional iha Xina, opozitor "halibur ona espíritu ema nian ne'ebé maka Prémiu Nobel distingi".

"Iha nia mate, nia afirma fali de'it eskolla hosi Komité Nobel nian", nia hakotu.

ho Lusa

 


Comentários

Critério de publicação de comentários