Pájina aktualizada iha 19:43h, segunda-feira 24 Jullu

Ba sentru komersial hodi apela ba joven sira hodi vota

17 de Julho de 2017, 22:43

Hosi António Sampaio

Selfie, joven animador na'in rua, jogu sira no to'o múzika K-Pop, buat hotu serve ona iha loron-domingu ne'e hodi tenta konvense, iha sentru komersial úniku Díli nian, ba joven eleitor sira hodi partisipa iha eleisaun lejislativu sira loron-sábadu tuirmai iha Díli.


Foto@ Nuno Veiga/EPA

Iha loron balun nia laran ba votasaun, objetivu maka promove partisipasaun eleitoral - abstensaun iha prezidensial sira loron 20 Marsu maka kuaze 29% - liuliu hosi sira ne'ebé joven liu, sira ne'ebé maka la liga ho polítika no, tanba ne'e, sei iha númeru aas ba abstensaun.

"Jovem Vota" hanesan naran hosi programa sensibilizasaun no edukasaun ba joven eleitor sira ba importánsia hodi uza sira nia direitu votu iha loron-sábadu tuirmai, bainhira ema timoroan sira vota hodi hili membru na'in 65 Parlamentu Nasional nian.

Programa, ne'ebé grava ona iha fatin sentral Timor Plaza nian, sentru komersial úniku iha Díli, agora sei transmiti beibeik iha televizaun timoroan to'o loron votu nian.

Ne'e hanesan eleisaun lejislativu dahuluk sira ne'ebé maka autoridade timoroan sira organiza lahó asisténsia téknika internasional, liuliu hosi ONU, maski iha instituisaun no organizasaun internasional oioin ne'ebé promove programa oioin liuliu programa ne'e.

Iha kazu ne'e, nia inisiativu maka esforsu hamutuk ida hosi Sekretariadu Tékniku ba Asisténsia Eleitoral (STAE) no hosi projetu Learn hosi Programa ONU nian ba Dezenvolvimentu (UNDP), ho asisténsia hosi governu sira Japaun ho Koreia nian.

Andrés del Castillo, xefe hosi projetu ba asisténsia eleitoral ONU nian iha Timor-Leste, fó hanoin ona ba Lusa katak ne'e hanesan votu dahuluk ne'ebé maka partisipa hosi joven sira ne'ebé moris iha tinan 2000 - iha nasaun ne'e bele vota hahú tinan 17.

"Hanesan joven dahuluk sira ne'ebé vota no moris hafoin ona okupasaun indonézia nian remata. Ema sira ne'ebé la moris iha funu sira", nia hatete.

Joven sira to'o tinan 30 reprezenta ohin loron hanesan 51% resin hosi eleitoradu no, tanba ne'e, nia partisipasaun hanesan, la'ós de'it importante, maibé determinante ba rezultadu hosi votu loron-sábadu nian.

"Pergunta sira, jogu sira no estratéjia sira seluk hodi explika ba joven sira saida maka sira presiza hodi vota, maibé mós tansá sira votu hanesan importante ba sira no ba nasaun", Castillo hatete.

"Ami explika mós prosesu votasaun nian, rezultadu votasaun sira nain no oinsá maka hala'o prosesu ne'e", nia afirma.

Urna sira ba votasaun lejislativu sira loron-sábadu sira loke entre tuku 07:00 to'o 15:00.

ho Lusa

 


Comentários

Critério de publicação de comentários