Pájina aktualizada iha 12:59h, tersa-feira 17 Outubru

Fretilin loke odamatan diálogu nian ho partidu tomak

03 de Agosto de 2017, 20:45

Sekretáriu-jeral Fretilin nian iha loron-kinta ne'e hatete ona katak partidu sei dialoga ho forsa polítika sira seluk ne'ebé eleitu ba parlamentu hodi harii Governu ida ne'ebé respeita vontade ne'ebé hatudu hosi eleitoradu iha loron 22 Jullu.


Mari Alkatiri konsidera katak, hafoin votasaun, povu renova konfiansa iha partidu sira ne'ebé antigu liu, Fretilin ho CNRT, maibé mós hatama ona "variável foun sira", bainhira hili forsa polítika foun rua ne'ebé maka tenki hanoin mós.

"Mensajen hosi povu maka entendimentu halo nafatin rezultadu sira, pelumenus iha konsolidasaun dame no estabilidade (...) no entendimentu ne'e tenki kontinua, entre CNRT ho bloku koligasaun ho Fretilin", nia hatete ba jornalista sira iha Palásiau Prezidensial iha Díli.

"Maibé povu hatete katak "imi la'ós hanesan úniku". Iha informasaun sira no variável foun sira, PLP ho KHUNTO. Bainhira iha entendimentu sei labele haluha atór foun sira ne'e", nia afirma.

Mari Alkatiri ko'alia ba jornalista sira hafoin reuniaun ida, besik oras ida, ho Prezidente timoroan, Francisco Guterres Lu-Olo, ne'ebé hahú ona kontaktu ho partidu polítiku sira ba formasaun Governu nian.

Tribunal Rekursu valida ona iha semana ne'e rezultadu hosi lejislativu sira loron 22 Jullu ne'ebé fó ba Frente Revolucionária do Timor-Leste Independente (Fretilin) fatin hamutuk 23 iha parlamentu, fatin 22 ba Congresso Nacional da Reconstrução Timorense (CNRT), fatin ualu ba Partidu Libertasaun Popular (PLP), fatin hitu ba Partidu Demokrátiku (PD) no fatin lima ba Kmanek Haburas Unidade Nacional Timor Oan (KHUNTO).

"Orientasaun hos Prezidente maka tenki respeita Konstituisaun no hodi respeita Konstituisaun partidu ne'ebé maka hetan liu votu tenki lidera prosesu formasaun Governu nian. Maibé ami komprende mensajen povu nian ne'ebé hatudu iha votu", nia afirma.

"Entendimentu dezde tinan 2012 too 2017 (entre CNRT ho Fretilin) tenki kontinua. Maibé ita iha mós partidu foun sira, PLP ho KHUNTO, ho preokupasaun sira no aspirasaun lejítimu sira", nia konsidera.

Alkatiri hatete ona katak, to'o agora, seidauk konsege ko'alia ho prezidente CNRT nian, Xanana Gusmão, hatudu konviktu katak konversa ne'e sei akontese no insisti katak laiha preokupasaun ho kalendáriu sira ka prazu sira.

"Ha'u hanoin katak laiha ema ida maka konsege ko'alia ho ha'u nia kompadre Xanana no ha'u ne'ebé maka hanesan kompadre seidauk konsege. Maibé, nu'udar kompadre, ha'u nia esperansa sei mantén", nia hatete.

Fretilin sei halibur iha loron hirak tuirmai ne'e Komité Sentral partidu nian no sei haruka, iha tempu badak, karta ida ba partidu tomak, ne'ebé hakarak defini saida maka sei halo "ho ekuasaun polítika foun" ne'ebé hetan hosi votu.

"Ita hasoru daudaun ekuasaun polítika foun ida iha Timor-Leste. Ita tenki haree oinsá hetan denominador komun ida. Ne'e maka hanesan baze: sei hanesan insidénsia parlamentar, Governu ida koligasaun nian, Governu ida ne'ebé iha inkluzaun maka'as. Saida maka ne'e?", nia hatete.

"Sei kompete mai ami hodi defini di'ak ekuasaun ne'e no haree variável sira ne'ebé maka iha no hetan solusaun ida. Ha'u hanoin katak la'ós hanesan simples, maibé mós la'ós hanesan buat ne'ebé susar ne'ebé maka ita sei labele ultrapasa", nia afirma.

Bainhira hatán kona-ba Lusa nia pergunta kona-ba Xanana Gusmão promete ona, durante kampaña, katak bainhira CNRT la manán sei husik partidu iha opozisaun, Mari Alkatiri hatete ona katak "buat ida hanesan promesa", buat seluk maka "mensajen hosi povu tenki entendida".

Alkatiri admiti ona katak hakarak atu negosiasaun bele hotu "iha semana ida nia laran", maibé nia subliña katak la preokupa bainhira demora tempu, garanti katak Governu no Parlamentu funsiona hela.

"Nasaun sei la tama iha krizi tanba prazu. Ha'u ladún preokupadu ho ne'e", nia afirma.

Independente hosi rezultadu negosiasaun sira, Governu foun tuirmai tenki aposta iha governasaun aberta "hodi bainhira presiza tenki ko'alia nafatin ho Igreja katólika, konfisaun relijiozu sira no sosiedade sivil", nia hatete.

Lu-Olo simu mós, durante loron ohin, lideransa sira hosi CNRT no PLP, no iha loron-sesta sei simu responsável sira hosi PD no KHUNTO.

ho Lusa

 


Comentários

Critério de publicação de comentários