Pájina aktualizada iha 00:34h, segunda-feira 22 Agostu

Relatóriu: Labarik mosambikanu hamutuk millaun ida resin serbisu

04 de Agosto de 2017, 01:40

Iha Mosambike, labarik millaun ida resin, entre tinan hitu no tinan 17, serbisu, refere hosi Relatóriu Inkéritu Integradu ba Forsa Serbisu nian (IFTRAB), ne'ebé fó sai hosi Ministériu Serbisu, Empregu no Seguransa Sosial (MITESS) Mosambike nian.


Dokumentu hatudu katak labarik mosambikanu sira ne'ebé serbisu hasoru hela forma aat sira hosi serbisu infantil ne'ebé inklui transporte merkadoria sira nian, minerasaun, agrikultura, komérsiu iha dalan sira no to'o prostituisaun.

Iha komentáriu sira ne'ebé halo iha reuniaun ida hosi análize relatóriu nian, ne'ebé maka Lusa iha asesu, ministra Serbisu, Empregu no Seguransa Sosial Mosambike nian, Vitória Diogo, aponta ona pobreza hanesan kauza ida hosi serbisu infantil iha Mosambike.

"Serbisu hetan forma aat liu bainhira bandu labarik hodi hetan nia direitu nu'udar labarik, nega ba nia edukasaun, lazer, protesaun no partisipasaun iha buat hotu ne'ebé maka iha respeitu ba labarik, sujeita labarik durante oras barak nia laran ba serbisu no hasoru risku oioin", afirma hosi Vitória Diogo.

Ministra hatutan katak dalan ida hodi nasaun kombate ka hamenus serbisu infantil maka aumenta ba renda familiar, liuhosi kriasaun ba postu serbisu nian.

"Kombate ba dalan aat liu hosi serbisu infantil maka halakon sira nia kauza prinsipal sira. Iha ami nia kazu, pobreza ho nesesidade aumenta fonte sira rendimentu hosi família sira ne'ebé maka presiza atensaun maka'as", nia hatete.

Ministra Serbisu, Empregu no Seguransa Sosial Mosambike nian indika ona katak iha tinan rua ikus ne'e harii ona postu serbisu hamutuk rihun 580 ne'ebé postu hamutuk 145.330 prenxe ona hosi feto sira.

ho Lusa

 


Comentários

Critério de publicação de comentários