Pájina aktualizada iha 12:59h, tersa-feira 17 Outubru

Xanana Gusmão demiti hosi CNRT, defende katak partidu tenki hanesan opozisaun timoroan

04 de Agosto de 2017, 21:48

Iha loron-sesta ne'e Xanana Gusmão demiti ona hosi prezidénsia CNRT nian, asumi responsabilidade ba partidu nia lakon iha lejislativu timoroan sira nian, no defende ona katak partidu labele tama iha koligasaun ida governu nian no tenki hanesan opozisaun.


"Ho sentimentu tristeza ida, maibé ne'ebé maka la konsege hamenus orgullu maka'as ida tanba lidera ona partidu ida hanesan CNRT, ha'u mós, obedese ba imperativu hosi ha'u nia konsiénsia, ha'u tenki foti desizaun ida kona-ba ha'u nia aan rasik", hatete hosi líder Congresso Nacional da Reconstrução Timorense nian.

"Ha'u demiti ona hosi kargu prezidente partidu nian, iha nafatin disponibilidade hosi organizasaun boot polítika partidáriu nian. Iha tinan lima oinmai ha'u sei fó ha'u nia apoiu tomak hodi hadi'a no hametin partidu CNRT, ne'ebé ha'u respeita, tanba iha nafatin ha'u nia fuan", nia hatete.

Xanana nia demisaun, ne'ebé halo dirijente no militante sira hosi partidu hakfodak, mosu iha parte ikus hosi diskursu ne'ebé nia halo uluk análize ida ba partidu nia lakon iha eleisaun lejislativu 2017 nian.

Hafoin hadook aan hosi vida públika dezde votasaun - períudu ne'ebé nia hatete katak halo reflesaun ida kona-ba eleisaun sira - Xanana Gusmão hatete katak votu hatudu ona katak populasaun timoroan "la konfia iha CNRT hodi governa" no hakarak "alternánsia" iha Governu.

Nia hatete katak CNRT tenki fiar iha nia kompromisu no, tanba ne'e, Xanana Gusmão defende katak konferénsia ne'ebé sei hala'o to'o loron-domingu aprova rezolusaun ida ne'ebé konfirma katak sei hanesan opozisaun no sei la halo parte iha Governu tuirmai ne'ebé lidera hosi Fretilin.

"Partidu CNRT desidi halo parte iha Parlamentu Nasional hanesan opozisaun, nune'e, hakarak kontinua kontribui iha prosesu konstrusaun Estadu nian no konstrusaun Nasaun nian, hodi hametin tranzisaun demokrátiku iha nasaun ne'e", Xanana Gusmão hatete.

Líder istóriku timoroan hanesan taxativu, hodi afirma katak "partidu sei la aseita proposta sira, hosi ema ruma, sei la konvida partidu ruma hodi harii koligasaun, tanba lakohi partisipa iha governu" no sei la repete saida maka akontese iha tinan 2007, bainhira CNRT sai hanesan partidu daruak ne'ebé hetan liu votu hafoin Fretilin maibé "hodi rezolve krizi sira ne'ebé nasaun hasoru iha tempu ne'ebá", hili ona hodi harii aliansa ida hosi maioria parlamentar.

"Ohin loron, ita hotu goza ambiente ida oiseluk - ambiente ida dame no estabilidade! Tanba razaun ne'e, ami tenki rekoñese katak situasaun 2017 nian la'ós hanesan ho 2007", nia afirma.

Xanana Gusmão felisita Fretilin tanba vitória iha eleisaun sira no hatete katak durante kampaña nia rona de'it "krítika sira katak CNRT laiha kapasidade hodi governa no nune'e maka nia tenki bolu partidu sira seluk hodi ajuda".

"Ami rona mós, durante fulan tomak nia laran, katak, durante CNRT nia mandatu, iha korupsaun barak, nune'e maioria hosi povu lakon konfiansa iha partidu", nia afirma.

"Ne'e hanesan momentu loos ba Fretilin, hanesan partidu vensedor hosi eleisaun sira 2017 nian, hodi asumi diresaun Governu nian ho lejitimidade", nia hatutan mós.

Konferénsia Nasional hosi kuadru sira hosi partidu CNRT hala'o ho seguransa maka'as, ho jornalista sira hetan de'it autorizasaun iha abertura no partisipante tomak tenki husik telefone iha parte liur.

"Konferénsia la loke ba públiku no limitadu de'it ba estrutura superior sira hosi partidu", Vergílio Smith, visi-prezidente ida hosi partidu, esplika ba Lusa.

Iha enkontru ne'e partisipa konferensista na'in 240 resin, inklui elementu sira hosi Komisaun Polítika Nasional (CPN) hosi Komisaun Diretivu Nasional (CDN) no hosi estrutura aas sira iha nível munisipal no hosi postu administrativu sira.

Reuniaun sei hotu ho deklarasaun final ida, seidauk konfirma realizasaun ba konferénsia imprensa ida.

ho Lusa

 


Comentários

Critério de publicação de comentários