Pájina aktualizada iha 00:36h, segunda-feira 22 Agostu

Kongresu estraordináriu hosi partidu CNRT sei desidi Xanana Gusmão nia futuru

07 de Agosto de 2017, 09:15

Intensaun hosi demisaun Xanana Gusmão nian hosi prezidénsia hosi partidu timoroan daruak ne'ebé hetan liu votu, CNRT, sei desidi de'it iha kongresu estraordináriu ida ne'ebé sei halo iha fulan hirak tuirmai, haktuir hosi rezolusaun ne'ebé aprova hosi lideransa partidáriu.


Partidu, ne'ebé halo reuniaun iha findesemana ne'e iha konferénsia nasional, desidi mós katak sei halo parte iha opozisaun iha lejislatura tuirmai, to'o 2022, iha posibilidade hodi "fó" militante sira hodi halo parte iha ezekutivu tuirmai.

"Iha prinsípiu Xananan Gusmão sei la hasai demisaun, ne'ebé sei suspensa, adiadu, to'o Kongresu. Hela nu'udar prezidente iha ezersísiu. Estatutu sira determina katak iha de'it Kongresu Estraordináriu maka iha kbiit hodi foti desizaun ne'e", esplika hosi Dionísio Babo, prezidente hosi Komisaun Diretivu Nasional (CDN).

Rezolusaun hatete katak delegadu sira hosi partidu apela ona ba Xanana Gusmão hodi hanoin fali nia desizaun atu demiti hosi prezidénsia, knaar ne'ebé nia kaer "lahó kbiit tomak" no to'o hala'o kongresu estraordináriu ida.

Kongresu bele inklui eleisaun ida hosi kargu diretivu sira seluk, tanba dirijente oioin hosi CNRT, inklui Xanana Gusmão rasik, konfirma ona katak sei la halo parte hosi deputadu sira iha parlamentu.

Babo konfirma ona ba Lusa katak Congresso Nacional da Reconstrução Timorense (CNRT) seidauk simu konviti formal ida hosi partidu ne'ebé hetan liu votu iha lejislativu 22 Jullu liubá, Frente Revolucionária do Timor-Leste Independente (Fretilin), hodi harii Governu.

Iha diskursu hodi taka konferénsia, Xanana Gusmão felisita sinseridade ne'ebé iha durante debate ida "hosi raio x to'o saúde" partidu nian ne'ebé "sai forte liu no iha tan kapasidade" hafoin "ezersísiu boot hosi análize internu".

"Partidu ne'e iha tinan 10. Ita labele hatete katak sei para. Sei kontinua, forte liután, maski hosi susar sira ne'ebé ita haree, hosi laran-moras balun, hosi sira seluk ne'ebé la rona no sira ne'ebé maka moras", nia hatete.

"Partidu ne'e la mate ida no sei la mate. Partidu maka imi. Partidu maka sira ne'ebé maka ita reprezenta iha ne'e. Ita simu todan ne'e ho responsabilidade maka'as, tau iha imi nia fuan sira no iha imi nia neon responsabilidade ne'e iha povu nia oin", nia afirma.

"Ha'u senti haksolok tanba imi, ho vontade tomak entrega ba partidu no ha'u fiar katak tanba ne'e partidu sei sai forte liután no sei la'o ba oin", nia hatete.

Xanana Gusmão hatete katak debate hatudu ona katak presiza hametin estrutura partidáriu no harii dirijente no militante sira, prosesu ne'ebé ema tomak tenki halo tuir.

"Ha'u husu ba imi atu hanoin no estuda, aprende, buat ne'ebé maka ha'u prepara ona, imi balun hasai tiha ona kursu sira maibé hanesan baruk-teen. La estuda, la buka buat seluk, la le", nia afirma.

"Ita nia slogan maka fiar iha ita nia aan rasik. Maibé ne'e eziji dezenvolve ita nia kapasidade. Imi bele iha kursu sira maibé tenki hatene oinsá aplika iha ne'e", nia konsidera.

Partidu agora sei aposta iha prosesu oioin ne'ebé hakarak hametin CNRT hodi hanoin ba tinan 2022 no ne'ebé inklui formasaun polítika no jestaun hosi kuadru sira, formasaun ba deputadu sira no lideransa no debate iha área temátiku oioin.

ho Lusa

 


Comentários

Critério de publicação de comentários