Pájina aktualizada iha 09:24h, kuarta-feira 20 Setembru

Mari Alkatiri konfirma indikasaun hosi koligasaun hosi lidera Governu timoroan tuirmai

12 de Setembro de 2017, 21:55

Iha loron-tersa ne'e, Mari Alkatiri, sekretáriu-jeral Fretilin nian, partidu ne'ebé hetan liu votu, konfirma ona katak nia aseita ona indikasaun hosi koligasaun hodi sai nu'udar primeiru-ministru no ne'ebé sei harii Governu konstitusional dahitu Timor-Leste nian.


"Hafoin diálogu oioin ha'u desidi aseita sai nu'udar kandidatu ba primeiru-ministru", Mari Alkatiri hatete iha loron-tersa ne'e iha sede Frente Revolucionária do Timor-Leste Independente (Fretilin) iha Díli.

"Partidu tolu hosi koligasaun nia eskolla ba ha'u nia pesoal hanesan determidu ona. Demora liu maka ha'u nia desizaun hodi aseita ka la'e", nia hatete hodi esplika katak iha loron-kuarta desizaun ne'e sei komunika ba xefe Estadu, Francisco Guterres Lu-Olo.

Bainhira hatán ba Lusa kona-ba, iha fulan hirak ikus ne'e, nia hatete katak lakohi sai primeiru-ministru, Alkatiri hatete katak nia hetan presaun maka'as.

"Ema ne'ebé maka koñesidu tebes iha nasaun hatete ohin mai ha'u katak tenki avansa no laiha opsaun seluk mai ha'u. Maibé ha'u tenki senti preparadu ba glória ka bele simu krús", nia hatete.

Alkatiri ko'alia durante interupsaun badak ida iha enkontru ne'ebé lideransa hosi Fretilin mantén ho líder sira hosi partidu sira koligasaun nian Partidu Demokrátiku (PD) ho Kmanek Haburas Unidade Nacional Timor Oan (KHUNTO), ne'ebé hanesan partidu dahaat no dalima ne'ebé hetan liu votu iha lejislativu loron 200 Jullu liubá.

"Ohin, hafoin reuniaun ne'e no diálogu foun sira ho personalidade oioin, ha'u desidi aseita kandidatura", nia hatete no refere katak kalendáriu ba formasaun Governu nain depende agora ba xefe Estadu.

Hafoin semana barak negosiasaun nian, partidu tolu hasoru malu iha loron-tersa ne'e hodi taka negosiasaun sira ba formasaun Governu ne'ebé Alkatiri garanti ona ba Lusa katak sei iha membru sira hosi partidu tolu maibé mós hosi "personalidade sira seluk" nasaun nian.

"Iha personalidade sira ho méritu ne'ebé sei hetan konviti", nia hatete maibé lakohi fó sai naran sira.

Nia hatete katak ezekutivu sei "ki'ik duké Governu daneen", ne'ebé agora daudaun halo hela funsaun sira, sei iha ministru sira Estadu nian no sei hahú prenxe hafoin reuniaun loron-kuarta nian ne'ebé lideransa hosi partidu tolu sei halo ho xefe Estadu.

Bainhira hatán kona-ba karik eleisaun ba prezidente Parlamentu Nasional, iha semana liubá, hatudu falta koezaun ruma iha koligasaun Governu nian - entre sira reprezenta deputadu na'in 35 maibé kandidatu hosi Fretilin hetan de'it votu 33, liu ida de'it duké nia rival - Alkatiri hatete katak ne'e hanesan prosesu ida ne'ebé "sei estabiliza hela".

"Ami laiha tempu hodi estabiliza koligasaun antes vota. Koligasaun konklui iha loron 04 no votasaun halo iha loron 05. Aniceto Guterres hanesan prezidente no lalika ko'alia tan asuntu ne'e. Koligasaun sei hahú estabiliza ho tempu. No sei laiha tan votu sekretu sira", nia esplika.

Alkatiri konfirma mós momentu sira kona-ba negosiasaun sira entre Partidu Libertasaun Popular (PLP) - partidu datoluk ne'ebé hetan liu votu - ne'ebé antes fó sai hanesan membru koligasaun nian (hamutuk ho KHUNTO no la'ós ho PD), maibé hafoin ne'e sai hosi posibilidade ne'e.

Sekretáriu-jeral Fretilin nian konfirma ona katak PLP aprezenta ona hanesan ezijénsia katak nia líder ida - iha kazu ne'e maka líder hosi bankada, Fidelis Magalhães - tenki sai hanesan prezidente Parlamentu Nasional.

"La'ós lakohi aseita. Bainhira ami avansa ho ezijénsia PLP nian ami sei la manán votu ida, maibé sei lakon. Karik Taur Matan Ruak (líder hosi partidu nian) ha'u laiha dúvida. Agora ami bele lakon ho kandidatu ne'ebé sira aprezenta".

ho Lusa

 


Comentários

Critério de publicação de comentários