Pájina aktualizada iha 23:13h, domingu 19 Novembru

Tribunal xinés kondena mane ida tanba hanorin Alkoraun iha aplikasaun mensajen nian

12 de Setembro de 2017, 22:43

Tribunal ida hosi Xinjiang, rejiaun iha estremu noroeste Xina nian, kondena ona mane ida ba kadeia tinan rua, tanba hanorin Alkoraun ba belun sira no família sira iha aplikasaun ida mensajen instantáneu sira nian, fó sai hosi imprensa estatal iha loron-tersa ne'e.


Huang Shike, ho tinan 49, konsidera hanesan kulpadu tanba "uza tuir dalan ilegal informasaun no Internet", haktuir hosi desizaun hosi Tribunal Supremu Popular hosi Xinjiang, ne'ebé haktuir hosi jornal ofisial Global Times.

Bainhira hanorin Alkoraun iha fatin sira ne'ebé la'ós relijiozu, Huang "perturba ona orden administrativu sira ba atividade relijiozu normal" no "prejudika maka'as sosiedade", Tribunal hatutan.

Mane, membru hosi minoria étnika xineza ho orijen musulmanu 'hui', estabelese ona grupu ida iha Wechat - ekivalente xinés nian ba WhatsApp -, iha tinan 2016, ne'ebé nia hanorin reza ba ema na'in 100 resin, maioria maka belun sira no família sira.

Iha fulan-Agostu 2016, deskonfia mós katak mane ne'e esplika ba grupu ida seluk signifikadu hosi feriadu islámiku hosi Eid al-Adha ("Festa Sakrifísiu nian"), tuir Global Times.

Pekin halakon ona ka kontrola prátika musulmanu oioin, inklui mantén hasan-rahun naruk no jejun durante fulan Ramadaun nian, iha rejiaun Xinjiang, ne'ebé konsidera hanesan símbolu sira hosi "estremizmu islámiku" nian.

Autoridade sira hosi Xinjiang bandu mós aman-inan sira atu fó naran islámiku ba sira nia oan, iha tentativa ida hodi labele iha influénsia relijiaun nian iha rejiaun ida ne'ebé dalabarak sai hanesan palku konflitu entre minoria musulmanu xineza 'uigure' ho maioria 'han'.

Prezidente xinés, Xi Jinping, husu ona ba governu lokal sira hodi integra minoria musulmanu sira iha kultura "han" sira nian.

Xina konsidera separatista sira hosi Xinjiang hanesan responsável ba konflitu sira iha rejiaun. Maibé, espesialista sira no grupu sira ne'ebé defende direitu ema nian afirma ona katak polítika represivu hosi Pekin kona-ba kultura no relijiaun hosi ema 'uigure' sira aumenta tensaun sira.

Autoridade xineza sira aumenta nafatin kontrolu kona-ba komentáriu sira iha rede sira no espasu sira hosi diskusaun "online". Iha semana liubá, Administrasaun hosi Siberespasu Xina nian publika ona regulamentu ida, ne'ebé estabelese katak empreza sira hosi área ne'e tenki verifika identidade loloos hosi membru sira iha grupu sira diálogu nian iha área "online".

Regulamentu estabelse mós mekanizmu ida ne'ebé klasifika kredibilidade hosi utilizador sira nian.

ho Lusa

 


Comentários

Critério de publicação de comentários