Pájina aktualizada iha 18:26h, segunda-feira 20 Novembru

PM timoroan konvoka reuniaun urjente hafoin operasaun ba ró xinés sira ho tubaraun

13 de Setembro de 2017, 18:53

Primeiru-ministru timoroan halo enkontru, iha loron-kuarta ne'e, ho responsável oioin nasaun nian, relasionadu ho rezultadu hosi operasaun ba ró xinés sira ne'ebé hetan halo peska ba tubaraun iha tasi sira iha nasaun laran.


Foto@ Jake Parker/Sea Shepherd/EPA/Lusa

Rui Maria de Araújo konfirma ona ba Lusa katak reuniaun, ne'ebé iha prezensa hosi prokurador-jeral, ministru Interior ho komandante Mariña, no personalidade sira seluk, konvoka urjente hafoin ajénsia Lusa fó sai iha notísia kona-ba detalle hosi operasaun, ne'ebé halo iha loron-sábadu liubá hosi Polísia Nasional Timor-Leste (PNTL), apoiadu hosi elementu sira hosi organizasaun ambiental Sea Shepherd.

"Ita tenki investiga kona-ba asaun ne'ebé akontese. Autoridade judisial sira sei haree prova sira ne'ebé iha no tenki foti medida sira. Ami sei rezolve asuntu ne'e", afirma hosi primeiru-ministru ba Lusa.

Iha loron-sábadu, Lusa fó sai ona iha notísia katak ró xinés sira, ho lisensa hodi halo operasaun iha tasi timoroan nian, kaer fila fali tubaraun, espésie protejidu ida iha Timor-Leste, durante operasaun ne'ebé halo hamutuk entre polísia timoroan no organizasaun ambiental Sea Shepherd.

Gary Stokes, responsável hosi asaun ne'e hosi Sea Shepherd, hatete ona ba Lusa katak ró sira kaer hetan bainhira halo hela peska liuliu ba tubaraun iha operasaun ida ne'ebé halo iha loron-sábadu liubá iha largu portu Com nian, iha kosta norte Timor-Leste nian.

Ró sira ne'e pertense ba empreza xineza sira Hong Long Fisheries ho Pingtan Marine Entreprises no hahú iha tinan 2016 nia rohan iha lisensa ida hodi halo operasaun iha tasi timoroan nian.

Operasaun envolve ona ró Ocean Warrior hosi Sea Shepherd ne'ebé, ho ró peska sira ne'ebé lalais, ajuda lori ona efetivu sira PNTL nian, ne'ebé halo ona operasaun iha ró sira nia laran, akompaña no rejistadu hosi "drone sira" no hosi kámara sira hosi organizasaun ambiental nian.

Ministru Interior timoroan nian, Longuinhos Monteiro, hatete ona ba Lusa katak operasaun ne'e halo hafoin iha kesar ida katak ró sira ne'e kontinua nafatin kaer tubaraun no espésie protejidu sira, nune'e prokuradora Angelina Saldanha fó instrusaun hodi halo inspesaun.

"Durante inspesaun hetan ona tubaraun rihun resin iha ró sira nia laran. Sira hasai ona foto no halo ona inkéritu balun hodi hetan informasaun. Relatóriu entrega ona ba Ministériu Públiku no ami hein hela agora instrusaun sira", nia hatete.

Bainhira hatán kona-ba preokupasaun sira hosi Sea Shepherd katak ró sira - ne'ebé para hela iha largu kosta norte nian - bele halai hosi tasi timoroan nian, ministru hatete ona katak haruka ona polísia marítima no komponente naval hosi Forsa sira Defeza Timor-Leste nian (F-FDTL).

"Ami orienta ona atu bele foti medida nesesáriu sira hodi hasoru ho posibilidade tomak. Maibé maski iha relatóriu hosi faktu sira ne'ebé hetan, ami sei haree ho Ministériu ne'ebé kaer asuntu ne'e hodi fó lalais kastigu administrativu no lalika hein prosesu kriminal nian", nia hatete.

Stokes garanti ona katak "liu 95% hosi sasán sira ne'ebé iah ró laran maka hanesan tubaraun", ne'ebé kaer ho "rede boot sira ne'ebé maka soe ba tasi laran iha zona ida ho klean entre metru 60 no metru 80", ne'ebé estraga ona ahu-ruin sira iha rejiaun.

"La'ós de'it hamenus populasaun hosi tubaraun nian maibé halo estraga maka'as ba ekosistema lokal", nia refere.

Eis-Prezidente timoroan José Ramos-Horta konsidera katak labele "aseita" asaun hosi ró xinés sira ne'ebé halo operasaun iha tasi timoroan ho lisensa sira ne'ebé Governu fó dezde tinan liubá no subliña katak Díli tenki atua.

Horta esplika ona katak dezde fulan-Abril maka nia halo ona apelu sira ba organizasaun ambiental sira, inklui Sea Shepherd, hodi tulun Timor-Leste hodi "kombate hasoru peska ilegal no ho total impunidade" tanba "laiha dalan hodi bandu" hosi parte timoroan nian.

"Labele tolera. Tenki iha multa boot ida no tenki prende ró sira to'o sira selu multa", nia afirma no defende akordu ida ba seguransa marítima ho Austrália.

"Ema australianu sira iha disponibilidade nafatin hodi apoia Timor-Leste iha área ne'e, ajuda hametin kondisaun sira iha nasaun. Hanesan solusaun ida ne'ebé seidauk rezolve 100%. Governu tenki halo atuasaun", nia afirma.

ho Lusa

 


Comentários

Critério de publicação de comentários