Pájina aktualizada iha 18:28h, segunda-feira 20 Novembru

Timor-Leste sei iha Governu ho membru na'in 30 no sei inklui José Ramos-Horta

13 de Setembro de 2017, 19:55

Governu konstitusional dahitu timoroan nian, lidera hosi Mari Alkatiri no sei simu pose iha loron-sesta, bele iha elementu na'in 30 resin no sei konta ho membru sira hosi Fretilin no PD no personalidade independente oioin inklui José Ramos-Horta.


Iha deklarasaun sira ba ajénsia Lusa, fonte sira hosi Fretilin hatete ona katak eis-Prezidente sei kaer fali knaar ne'ebé nia okupa iha Governu dahuluk, nu'udar ministru Negósiu Estranjeiru, iha ezekutivu ida ne'ebé nia kompozisaun total karik seidauk bele hatene iha loron-sesta ne'e maibé iha semana hirak tuirmai.

Mari Alkatiri konfirma ona iha loron-kuarta ne'e katak hafoin nomeadu hosi xefe Estadu, Francisco Guterres Lu-Olo - asaun ne'ebé bele akontese iha oras hirak tuirmai -, sei aselera prosesu hodi hili elenku governativu, hodi to'o iha tempu hodi simu pose iha loron-sesta.

Hafoin simu tiha iha loron-kuarta ne'e lideransa hosi Fretilin ho PD, xefe Estadu iha enkontru ne'ebé marka ona ho partidu tolu ne'ebé prezente iha Parlamentu, Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO).

Objetivu maka halo hamutuk tomada pose ezekutivu nain ho abertura solene ba sesaun lejislativu dahuluk hosi lejislatura, ne'ebé previstu ba loron-sesta dadeer no ne'ebé xefe Estadu sei halo nia diskursu.

Nune'e sei permiti ba Francisco Guterres Lu-Olo hodi bele halo viajen ba Nova Iorke hodi partisipa iha reuniaun Asembleia-Jeral ONU nian.

Mari Alkatiri no líder sira seluk hosi rente Revolucionária do Timor-Leste Independente (Fretilin) hasoru malu iha loron-kuarta ne'e ho lideransa hosi Partidu Demokrátiku (PD) - forsa rua ne'ebé asina iha loron-kuarta ne'e akordu koligasaun ida Governu nian ba tinan lima oinmai - hodi tenta taka detalle sira kona-ba kompozisaun hosi ezekutivu.

Mariano Sabino, prezidente PD nian, no fonte sira hosi Fretilin garanti ona ba Lusa katak la halo ezijénsia ruma tanba dezde hahú negosiasaun sira hosi kritériu ida maka ho karater proporsional nian.

Fretilin, ne'ebé manán lejislativu sira, iha fatin 23 hosi fatin 65 iha Parlamentu Nasional no PD, forsa dahaat ne'ebé hetan liu votu, hetan kadeira hitu.

La halo parte hosi koligasaun maka partidu KHUNTO - deputadu na'in lima - ne'ebé tuir esplikasaun hosi fonte Fretilin nian ba Lusa katak hadook aan iha faze ikus negosiasaun nian.

Iha kauza maka ezijénsia sira kona-ba númeru hosi fatin sira iha Governu ne'ebé rezerva ba membru sira hosi KHUNTO. Ho baze iha kritériu proporsionalidade nian, PD hetan fatin neen no KHUNTO iha fatin haat.

Iha reuniaun ne'ebé mantén iha loron-tersa, bainhira sei iha partidu tolu, Fretilin, hafoin presaun hosi KHUNTO, fó tan fatin ida ba partidu (hamutuk lima). Liutiha oras balun KHUNTO hakiduk hodi husu tan fatin balun maibé Fretilin la halo tuir.

Mari Alkatiri konfirma ona ba Lusa katak KHUNTO sai hosi koligasaun - maski odamatan "nakloke nafatin" - hodi esplika katak iha diverjénsia internu sira iha partidu, maibé nia lakohi hato'o tan komentáriu.

ho Lusa

 


Comentários

Critério de publicação de comentários