Pájina aktualizada iha 23:13h, domingu 19 Novembru

Timor-Leste ho moeda sentavu 200 foun ne'ebé hahú uza iha nasaun hahú loron-kuarta ne'e

13 de Setembro de 2017, 22:32

Hahú loron-kuarta ne'e, Timor-Leste iha ona moeda foun ida sentavu 200, ho folin ida ne'ebé ekivale ho dolar amerikanu rua, ne'ebé hakarak hamenus dependénsia no folin aas ne'ebé asosia ba substituisaun nota sira ho denominasaun ki'ik.


Foto@ Gabinete do Primeiro-Ministro de Timor-Leste

Osan-besi ne'e lansa iha loron-kuarta ne'e iha serimónia ida iha sede Banku Sentral nian iha Díli, prezidi hosi primeiru-ministru, Rui Maria de Araújo, hala'o liutiha tinan haat hafoin lansamentu ba osan-besi sentavu 100, iha tinan 2013.

Osan-besi ne'e hahú uza iha loron-kuarta ne'e - akontese iha temou hanesan ho Banku Sentral nia aniversáriu ba dala neen - no tau hamutuk ona ho sentavu 100, 50, 23, 10, 5 ho 1 ne'ebé maka uza ona iha nasaun laran, nasaun ne'ebé nia osan ofisial maka dolar amerikanu.

Abraão de Vasconselos, governador hosi Banku Sentral, hatete ona katak entidade kontinua administra sirkulasaun ba osan iha Timor-Leste, importante ba ekonomia nasaun nian, no importante maka hamenus kustu sira.

"Folin hosi repatriasaun ba nota sira dolar ida, dolar lima no dolar 10 - ne'ebé hetan estraga -hanesan aas tebes. Ami nia objetivu maka hamenus nafatin despeza ho uzu osan-besi nian", nia refere.

Rui Maria de Aráujo, xefe Governu nian, felisita ona esforsu sira ne'ebé Banku Sentral dezenvolve hela iha tinan hirak ikus ne'e hodi ajuda hametin ekonomia timoroan nian, inklui oinsá "garanti" jestaun hosi Fundu Petrolíferu, fonte prinsipal hosi finansiamentu Estadu nian.

Ho diámetru ida hosi milímetru 25,5 no todan ida hamutuk 8,46 grama, osan-besi ne'e iha núkleu sentral kór osan-mean no parte liu kór mutin - hanesan ho osan-besi sentavu 100 nian.

Iha parte prinsipal, no hanesan ho osan-besi sira seluk, osan-besik sentavu 200 nian iha kaibauk ida, enfeita tradisional hosi ulun nian ne'ebé maka uza iha Timor-Leste.

Iha parte seluk iha foho Matebian, foho daruak ne'ebé aas liu iha Timor-Leste no fatin ida ne'ebé uluk serve hanesan subar-fatin ba elementu sira rezisténsia nian ne'ebé kombate ona hasoru okupasaun indonéziu nian, karau ida no natar ida, elementu sentral sira hosi kultura no ekonomia nasional sira nian.

Karau uluk hanesan ona símbolu prinsipal hosi logótipu Banku Sentral nian.

Sara Brites, visi-governador hosi Banku Sentral, esplika ona katak objetivu hosi introdusaun ba osan-besi foun - ho folin ida ne'ebé hanesan ho dolar amerikanu rua - maka hamenus dependénsia nasaun nian iha nota sira ho denominasaun ki'ik.

"Osan-besi ne'e sei ajuda tebes hodi hamenus folin anual ne'ebé Governu iha tinan-tinan hodi substitui nota sira dolar 1, 5 no to'o dolar 10, sira ne'ebé uza liu no estraga lalais", nia esplika.

Visi-governador esplika ona ba Lusa katak agora daudaun sirkula ona iha nasaun dolar millaun 16 resin iha osan-besi sira sentavu nian no hein katak iha tinan hirak tuirmai sei fahe millaun neen resin iha osan-besi sentavu 200 nian.

Tinan-tinan, Timor-Leste tenki importa osan-besi no osan-tahan sira ne'ebé maka uza iha Timor-Leste no iha kazu sira hosi osan-tahan norte-amerikanu reprezenta folin ne'ebé aas, liuliu tanba seguransa ne'ebé presiza.

Osan-besi halo iha Casa da Moeda iha Portugal to'o tinan liubá no hahú agora sei halo iha Austrália.

ho Lusa


Comentários

Critério de publicação de comentários