Pájina aktualizada iha 03:16h, kinta-feira 20 Outubru

Universidade Madeira fó Honoris Causa ba Xanana Gusmão

12 de Outubro de 2017, 00:38

Universidade Madeira (UMa) fó, iha loron-segunda oinmai, título Doutor Honoris Causa ba Xanana Gusmão hodi rekoñese nia knaar iha rezisténsia timoroan hasoru okupasaun estranjeiru no tanba sai nu'udar fundador ida nasaun nian.


Atribuisaun akontese iha loron ida ne'ebé Akademia madeirense nian selebra abertu tinan akadémiku 2017/2018, iha sesaun solene ida ne'ebé ajenda ba tuku 17:00 (oras lokal), iha Auditóriu Reitoria nian, iha Koléjiu Jesuíta nian, informa hosi instituisaun iha loron-kuarta ne'e.

Aleinde korteju tradisional akadémiku nian, abertura solene hosi aula ne'e inklui intervensaun sira hosi prezidente Konsellu Jeral, Francisco Fernandes, hosi prezidente Asosiasaun Akadémiku nian, Carlos Abreu, no hosi reitor, José Carmo.

Iha serimónia atribuisaun títulu Doutor Honoris Causa ba Xanana Gusmão, Juís Konselleiru, no reprezentante Repúblika nian, Ireneu Cabral Barreto, sei kaer knaar nu'udar padriñu doutorandu nian.

Xanana Gusmão moris iha loron 20 Juñu 1946, iha Laleia, iha Distritu Manatuto.

Sai ona nu'udar Prezidente Repúblika, primeiru-ministru no ministru ba Planeamentu no Investimentu Estratéjiku hosi Governu Timor-Leste nian.

Agora daudaun hanesan membru hosi G7+, organizasaun intergovernamental ida ne'ebé permiti ba nasaun sira ne'ebé afetadu ho konflitu sira hodi iha influénsia tuir dalan desizivu ba formulasaun hosi polítika sira dezenvolvimentu nian.

Entre prémiu no distinsaun oioin ne'ebé maka nia hetan ona durante kareira iha mós Doutoramentu Honoris Causa hosi universidade sira hosi Austrália, Portugal, Brazil, Japaun ho Malázia.

Hodi taka sesaun solene ba abertura Tinan Akadémiku 2017/2018 sei iha atuasaun ida hosi TUMa - Tuna hosi Universidade Madeira nian no "Madeira de Honra" ida.

ho Lusa

 


Comentários

Critério de publicação de comentários