Pájina aktualizada iha 14:01h, sabado 16 Dezembru

Opozisaun parlamentar asina "plataforma polítika" hosi Aliansa Maioria Parlamentar

12 de Outubro de 2017, 22:00

Responsável sira hosi partidu tolu hosi maioria opozisaun iha Parlamentu Nasional timoroan nian asina iha loron-kinta ne'e "plataforma polítika ida hosi Aliansa Maioria Parlamentar" (AMP) hodi hatán asaun ne'ebé sira hanaran "falta hosi forsa polítika" hosi Governu minoritáriu.


Testu ho pájina lima asina ona hosi dirijente sira hosi Congresso Nacional da Reconstrução Timorense (CNRT), hosi Partidu Libertasaun Popular (PLP) no hosi Kmanek Haburas Unidade Nacional Timor Oan (KHUNTO) ne'ebé hamutuk iha fatin 35 hosi fatin 65 ne'ebé maka hetan iha Parlamentu.

Plataforma asina liutiha besik semana ida hafoin deputadu na'in 35 hakerek ba Prezidente Repúblika hodi oferese hodi sai hanesan alternativu Governu nian bainhira Programa hosi ezekutivu - apoia hosi deputadu na'in 23 hosi Frente Revolucionária do Timor-Leste Independente (Fretilin) bo deputadu na'in hitu hosi Partidu Demokrátiku (PD) - la hetan aprovasaun.

"Iha situasaun atual Governu laiha apoiu hosi maioria parlamentar nune'e hamosu susar iha implementasaun hosi programa lahó forsa polítika adekuadu, nune'e hamosu perigu ba dezenvolvimentu nasaun nian", refere hosi testu ne'ebé asina iha loron-kinta ne'e.

Testu asina ona hosi xefe sira bankada hosi partidu tolu, Arão Noé Amaral (CNRT), Fidelis Magalhães (PLP) ho Luís Roberto da Silva (KHUNTO) no tuir loloos líder máximu sira hosi partidu sira tenki sai hanesan sasin maibé responsável hosi KHUNTO de'it, José dos Santos Naimori, maka marka de'it prezensa.

Xanana Gusmão, prezidente CNRT nian, iha estranjeiru no iha asinatura ne'e reprezenta hosi sekretáriu-jeral partidu nian, Francisco Kalbuadi, no Taur Matan Ruak, prezidente PLP, reprezenta hosi José Freitas, dirijente ida hosi partidu.

Ba jornalista sira, Arão Noé Amaral hatete ona katak desizaun hosi bankada sira hodi halibur hamutuk iha AMP tuir "orientasaun polítika sira hosi partidu" no iha kazu CNRT nian "inklui autorizasaun hosi Komisaun Polítika Nasional (CPN) ne'ebé prezidente partidu nian, Xanana Gusmão, halo mós parte".

Líder hosi CNRT, ne'ebé agora daudaun iha Haia hodi reprezenta Estadu timoroan nian iha negosiasaun sira ho Austrália kona-ba fronteira tasi nian entre nasaun rua, hatete ona hafoin eleisaun katak lakohi repete saida maka akontese iha 2007, bainhira CNRT sai hanesan partidu daruak ne'ebé hetan liu votasaun hafoin Fretilin no hili harii aliansa ida maioria parlamentar nian.

Xanana Gusmão hatet emós katak partidu sei la aseita "proposta hosi ema ruma", no sei la konvida "partidu ruma hodi harii koligasaun sira" tanba nia lakohi halo parte iha Governu.

Kona-ba eventual apoiu ida ba Programa Governu nian, ne'ebé reflete parte barak hosi detalle iha lista hosi prinsípiu sira AMP nian, Arão Noé hatete mós katak presiza "diskuti" asuntu ne'e.

"Agora daudaun ami hakarak asina de'it plataforma ida hodi iha opsaun ida bainhira programa governu nian la hetan aprovasaun", nia afirma.

Kona-ba karik akordu ne'e implika atu bankada tolu tenki halo votu iha bloku, Fidelis Magalhães hatete katak akordu ne'e hanesan "konsertasaun polítika" ne'ebé "deputadu sira hotu, na'in 35, iha votu ida" no iha kauza maka "prátika parlamentar normal sira".

Luís Roberto da Silva, líder hosi bankada KHUNTO, afirma ona katak ne'e hanesan "plataforma ida hodi hanoin iha futuru" no hanoin "ba nasaun" la'ós "atu estraga nasaun maibé haree ba interese nasional, garanti dame no estabilidade".

Iha eleisaun sira loron 22 Jullu, eleitoradu timoroan la fó maioria ba partidu ida no formasaun Governu ida "estável no reprezentantivu" presiza diálogu entre partidu sira ne'ebé iha kadeira iha parlamentu, testu ne'ebé asina iha loron-kinta destaka prinsípiu jeral sira hosi polítika AMP nian hanesan "garanti estabilidade governativu".

Testu esplika katak plataforma sei defini programa ida ho "polítika públiku rigorozu sira no inkluzivu hodi mobiliza povu hanesan parte hosi dezenvolvimentu nasional, hodi garanti uzu ba rekursu sira ho di'ak no efisiente".

"Prinsípiu sira ho vizaun" hosi plataforma ne'ebé asina iha loron-kinta - ne'ebé ho baze iha Konstituisaun no iha implementasaun hosi Planu Estratéjiku Dezenvolvimentu (PED) 2030 nian - ne'ebé hatudu liña jeral sira hosi polítika ne'ebé maka AMP hakarak halo.

Kontinua promove estabilidade, dame ho seguransa nasional, relasiona investimentu públiku ho nesesidade hosi populasaun, avansa iha polítika desentralizasaun no hametin sistema judisial hanesan "independente, efisiente ho justu", hanesan prinsípiu balun.

AMP hakarak mós promove transparénsia ho kontabilidade, avansa iha reforma fiskal, prezerva ho hametin jestaun hosi Fundu Petrolíferu - fonte prinsipal hosi reseita Estadu nian -, promove área privadu no ajuda kria oportunidade serbisu nian.

Halo mós parte hosi lista prinsípiu sira koligasaun nian maka promove edukasaun ho kualidade, hadi'a kualidade iha serbisu sira saúde nian, fó korajen ba emprendedorizmu, auto-empregu no empreza médiu ho ki'ik sira no hametin programa sira ne'ebé fasilita no halo sai baratu kréditu sira.

Lista subliña mós rekoñesimentu ba antigu kombatente sira, protesaun labarik sira, feto sira, katuas-ferik sira no ema defisiente sira, apoia juventude ho promove igualdade, ajuda dezenvolve identidade kultural timoroan nian no promove polítika ida habitasaun rural no urbanu nian ho kualidade.

ho Lusa

 


Comentários

Critério de publicação de comentários